Սանկտ-Պետերբուրգի իր նստավայրում ՌԴ նախագահ Պուտինը ընդունել է Իրանի Ազգային անվտանգության բարձրագույն խորհրդի քարտուղար Ահմադիանին:
ՌԻԱ-Նովոստին հայտնում է, որ հանդիպմանը Վլադիմիր Պուտինը խոսել է Իրանի հետ հարաբերությունների կարեւորությունից:
Նա իրանցի պաշտոնյային խնդրել է ողջույնների փոխանցել ԻՀ Գերագույն հոգեւոր առաջնորդ Խամենեիին, հավաստիացրել, որ Մոսկվան հարաբերություններ զարգացնելու մտադրություն ունի նախագահ Փեզեշքիանի կառավարության հետ: Ռուսաստանի նախագահը հատուկ ընդգծել է «Հյուսիս-հարավ» միջազգային հաղորդակցության նշանակությունը:
Խոսքն Ադրբեջանի տարածքով Ռուսաստան-Իրան երկաթուղային հաղորդուղու մասին է, որ Սանկտ-Պետերբուրգը պետք է կապի Պարսից ծոցի նավանահնագիստներին, այնուհետեւ՝ Հնդկաստանին:
Այդ նախագիծն ամբողջացնելու համար Իրանում պետք է կառուցվի 162կմ. երկարության երկաթգիծ, որի մեկնարկը դեռեւս չի տրվել, թեեւ Ռուսաստանն Իրանին մոտ չորս միլիարդ եվրո արտոնյալ վարկ է տրամադրել: Վերջին մի քանի օրերին Իրանը Ռուսաստանի հասցեին մի քանի կոշտ հայտարարություն է արել՝ կապված այսպես կոչված «Զանգեզուրի միջանցքի» հետ:
Վլադիմիր Պուտինի եւ Ահմադիանի հանդիպմանն, ամենայն հավանականությամբ, այդ խնդիրը նույնպես քննարկվել է, բայց Կրեմլի պաշտոնական հաղորդագրությունը, կարծես, այն շրջանցել է:
Կարելի է ենթադրել, որ տեսակետների համաձայնեցում տեղի չի ունեցել կամ ձեռք է բերվել այնպիսի պայմանավորվածություն, որ դեռեւս հրապարակման ենթակա չէ: Իրանը եւ Ռուսաստանը գտնվում են համապարփակ համագործակցության մասին պայմանագրի ստորագրումից «մեկ քայլ հեռավորության վրա»: Այս իրավիճակում ցանկացած անզգույշ հայտարարություն կարող է վճռորոշ լինել:
Թիվ 1 սյունակ, Վահրամ Աթանեսյան
