Վարչապետ Նիկոլ Փաշինյանը Վրաստանի այցի ժամանակ անդրադարձել է հայ-ադրբեջանական բանակցություններին։
Նա նշել է, որ Հայաստանն ու Ադրբեջանը կարողացել են համաձայնեցնել խաղաղության պայմանագրի՝ մոտ 80%–ը։Փաշինյանը կրկնել է խաղաղության պայմանագիրն ստորագրելու իր առաջարկը.
«Մենք Ադրբեջանին առաջարկել ենք ամենամոտ ապագայում ստորագրել այդ փաստաթղթի նախագծում առկա ու մինչև այս պահն արդեն իսկ համաձայնեցված դրույթները, հաստատել դիվանագիտական հարաբերություններ ու շարունակել քննարկումները»,- ասել է նա։
Ըստ Փաշինյանի՝ Հարավային Կովկասում իրապես կա հակամարտության էջը փակելու ու տարածաշրջանում հարատև խաղաղություն հաստատելու պատմական հնարավորություն։
Ըստ նրա՝ դրանից կշահեն ոչ միայն Հայաստանն ու Ադրբեջանը, այլև Վրաստանը, Իրանը և Թուրքիան։
Նա առաջընթաց է որակել սահմանազատման հանձնաժողովների կանոնակարգի ստորագրումը, նաև նշել, որ սահմանազատման հարցեր կան նաև Վրաստանի հետ, հույս հայտնելով, որ այդ հարցերը ևս արագ ավարտին կհասցնեն։
