Սեպտեմբերի 14-ին «Վրացական երազանք» իշխող կուսակցության պատվավոր նախագահ Բիձինա Իվանիշվիլին Գորիում ընտրողների հետ հանդիպմանը սենսացիոն հայտարարություն է արել, որ հաղթելու դեպքում 2008թ. պատարեզմի համար «օս եղբայրներից եւ քույրերից ներողություն կխնդրեն՝ որպես քրիստոնեական համերաշխության առհավատչյա»:
Գրեթե բոլոր քաղաքական ուժերը դատապարտել են նրա կեցվածքը, գնահատել որպես «Ռուսաստանի ագրեսիան արդարացնելու փորձ»:
Ուշագրավ է, որ apsny.ge-ի ներկայացրած քաղաքական գնահատականներում իշխում է տեսակետ, որ «պատերազմը ոչ վրացիներն են սկսել, ոչ՝ օսերը, Ռուսաստանն է սկսել, որպեսզի մասնատի Վրաստանը»:
Քաղաքական արձագանքներին գումարվել է հանրային դժգոհությունը, որի մեկնարկը տվել է Վրաստանի ազգային հերոս Գերոգի Անցուխելիձեի այրին: Նա սոցիալական մեդիայում կարճ գրառում է կատարել. «Ներիր, Գեորգի»:
Գեորգի Անցուխելիձեն 2008թ. օգոստոսին 9-ին գերվել է Ցխինվալում եւ համարվել անհայտ կորած: Դեկտեմբերի վերջին ռուսական կողմը Վրաստանին է հանձնել մի քանի զինվորականի մասունքներ, ԴՆԹ փորձաքննությամբ հաստատվել է, որ դրանցից մեկը պատկանում է Գեորգի Անցուխելիձեին:
Ընտանիքը սոցցանցերում տարածված տեսանյութում ճանաչել է նրան: Տեսանյութը նկարահանել է օսեթական կողմը եւ պատկերում է ռազմագերու նկատմամբ գործադրված բռնությունները:
Մասունքների դատաբժշկական փորձաքննությամբ պարզվել է, որ Անցուխելիձեն գնդակահարվել է կրակահերթերով: Օգոստոսի 18-ին, նրա ծննդյան 40-րդ տարելիցի կապակցությամբ նախագահ Սալոմե Զուրաբիշվիլին Անցուպելիձեին անվանել է «երկրի էներգիայի եւ արժանապատվության աղբյուր»:
Անցուխելիձեն առանձնակի հարգանքի է արժանանում նաեւ այն պատճառով, որ նրա նախնիներն էթնիկ ավարներ են, Վրաստանի Թուշեթի լետնային շրջան են տեղափոխվել Դաղստանից:
«Վրացական երազանքը» ձգտում է խորհրդարանում սահմանադրական մեծամասնություն ունենալ: Ավելի վաղ Իվանիշվիլին ասել է, որ հաղթանակի դեպքում «կդատեն պատերազմի մեղավորներին»:
Կարծիք կա, որ օրենքով կարգելվի նախկին նախագահ Սաակաշվիլիի կուսակցության եւ քաղաքական մի քանի այլ ուժերի գործունեությունը:
Բայց, երեւում է, Իվանիշվիլիի անհաջող հայտարարությունը ընդդիմությունն օգատագործում է, որպեսզի «Վրացական երազանքը» հանրայնորեն ընկալվի որպես «սրբապիղծ». Վրաստանի ազգային հերոսը պարգեւատրվում է Վախթան Գորգասալի անվան առաջին աստիճանի շքանշանով:
Անգամ խորհրդային շրջանում Վախթանգ Գորգասալի արձանը Թբիլիսիի եւ Վրաստանի հովանավոր-հպարտությունն էր: Բիձինա Իվանիշվիլին նրա՞ն է մարտահրավեր նետում:
Թիվ 1 սյունակ, Վահրամ Աթանեսյան
