Վրաստանի Միգրացիոն ծառայությունը մերժել է Ադրբեջանի քաղաքացի Աֆղան Սադիգովի քաղաքական ապաստան ստանալու դիմումը: Այդ մասին հայտնել է նրա կինը՝ Սեւինջ Սադիգովան: Աֆղան Սադիգովը Բաքվից Թբիլիսի է տեղափոխվել անցյալ տարվա դեկտեմբերին՝ խուսափելով հետապնդումներից:
Թբիլիսիում նա կնոջ եւ երկու երեխայի հետ ապրում է վարձով: Հունիսի կեսերին Սադիգովը պետք է Թբիլիից թռչեր Ստամբուլ, բայց օդանավակայանում նրան արգելել են լքել Վրաստանի տարածքը՝ պատճառաբանելով, որ Ադրբեջանի դատախազությունը նրա դեմ քրեական գործ է հարուցել եւ պահանջում է արտահանձնում:
Սադիգովը AzeTV առցանց հարթակի հիմնադիրն է եւ զբաղվել է լրագրողական հետաքննությամբ՝ հիմնականում անդրադառնալով կառավարության եւ գործարար շրջանակների փոխկապակցվածության թեմային:
Ադրբեջանում նրա դեմ քրեական գործ հարուցվել է «խարդախություն» հոդվածով:
Ըստ տեղեկությունների, նրա դեմ մի քանի գործարար ցուցմունք է տվել, որ Սադիգովը՝ «սպառնալով հրապարակել անձնական կյանքին վերաբերող նյութեր դրամաշորթությամբ է զբաղվել»:
Վրաստանի Միգրացիոն ծառայությունը պատճառաբանել է, որ Սադիգովի դեմ քրեական գործում «քաղաքական հետապնդման տարրեր չկան»:
Որոշումը բողոքարկման ենթակ չէ: Առաջիկայում, ամենայն հավանականությամբ, Սադիգովը կարտահանձվի Ադրբեջանին եւ կկալանավորվի: Ադրբեջանում քաղհալածյալների թիվը կաճի եւս մեկով:
Թիվ 1 սյունակ, Վահրամ Աթանեսյան