AzelTV առցանց հարթակի հիմնադիր Աֆղան Սադիգովը Թբիլսիի մեկուսարանում անժամկետ հացադուլ է հայտարարել: Սադիգովը Վրաստան է տեղափոխվել անցյալ տարեվերջին՝ խուսափելով իր նկատմամբ Ադրբեջանի իշխող վարչակազմի հետապնդումներից:

Այս տարվա հունիսին նա ձերբակալվել է Թբիլիսիի օդանավակայանում, երբ պատրաստվում էր ընտանիքի՝ կնոջ եւ երկու երեխայի հետ մեկնել Ստամբուլ: Արգալանքի պատճառ է հանդիսացել Բաքվում Սադիգովի դեմ հարուցված քրեական գործը, որի հիմքով նրա նկատմամբ հետախուզում է հայտարարվել:

Աֆղան Սադիգովը դիմել է վերջին հնարավոր քայլի՝ քաղաքական ապաստան է հայցել, բայց Վրաստանի Միգրացիոն ծառայությունը մերժել է՝ պատճառաբանելով, որ նրա դեմ հարուցված քրեական գործում «քաղաքական հետապնդման տարրեր չկան»:

Սադիգովը մեղադրվում է խարդախության միջոցով դրամաշորթման մեջ:

Ըստ տեղեկությունների, նրա դեմ բողոք են ներկայացրել իշխանության հետ փոխկապակցված մի քանի գործարար եւ հայտնել, որ նա սպառնացել է «հրապարակել անձնական կյանքին վերաբերող նյութեր» եւ այդ ճանապարհով «խոշոր չափի գումարներ շորթել»։

Սադիգովի կինը հայտարարություն է տարածել եւ դիմել Վրաստանի հանրությանը, որպեսզի պաշտպանեն ամուսնուն:

Ավելի վաղ Վրաստանի մի քանի ՀԿ-ներ հանդես են եկել Սադիգովին քաղաքական ապաստան տրամադրելու եւ նրան Բաքվի հետապնդումներից պաշտպանելու առաջարկությամբ:

Ավելի հավանական է, որ մոտակա օրերին Աֆղան Սադիգովը կարտահանձնվի Ադրբեջանին եւ կկալանավորվի: Նրան սպասում է ութից մինչեւ տասներկու տարվա ազատազրկում:

Թիվ 1 սյունակ, Վահրամ Աթանեսյան