Լրագրող Թաթուլ Հակոբյանը «Ֆեյսբուքի» իր էջում գրել է.
«Այսօր Հայաստանում իշխանափոխություն կարող է տեղի ունենալ երկու դեպքում.
ա/ Նիկոլ Փաշինյանը հրաժարական է տալիս:
Նիկոլ Փաշինյանը, հավանաբար, մինչև խորհրդարանական նոր ընտրություններ հրաժարական չի տալու:
բ/ Մոսկվան հեղաշրջում է իրականացնում Հայաստանում և իշխանության բերում իր ցանկալի ուժին:
Քիչ հավանական է, որ Մոսկվան նման բան անի, քանի որ Բաքվի և Անկարայի ռազմավարական դաշնակից Ռուսաստանին պետք է հենց այնպիսի առաջնորդ, ինչպիսին Փաշինյանն է, որպեսզի արդարացնի իր անգործությունը Հայաստանի հետ պաշտպանական պայմանագրերը չկատարելու հարցում: Ստեղծվում է մթնոլորտ ու ընկալում, թե իբր Փաշինյանը արևմտամետ է, այդ պատճառով ի՞նչ անի խեղճ Ռուսաստանը, որ չի կարող աջակցել Հայաստանին:
Արդեն սկսվել է խորհրդարանական նոր ընտրարշավը, որն արտահայտվում է արևմտամետներ-ռուսամետներ պայքարով:
Երկուսն էլ Հայաստանի փրկությունը տեսնում են դրսից:
Երկուսից մեկը Հայաստանը տանում է ԵՄ, մյուսը՝ ԽՍՀՄ-2:
Սա, անշուշտ, խորը վերլուծության թեմա է, այս պահին նկատելի է, որ մի շարք կուսակցություններ և գործիչներ, որոնք խորը և երկար համագործակցել են ՔՊ-ի ու Նիկոլ Փաշինյանի հետ, սկսել են անխնա քննադատել գործող իշխանություններին:
Արդյո՞ք դա նրանց բերելու է հավելյալ քվեներ:
Երկար տարիներ ու տասնամյակներ մեր ընդդիմադիրները ընտրարշավը կառուցել են գործող իշխանություններին քննադատելով, այդ թվում՝ նաև երկար տարիների ընդդիմադիր Նիկոլ Փաշինյանը:
Փաշինյանին հաջողվեց տասնյակ հազարներ դուրս բերել փողոցներ, որովհետև մարդիկ մերժում էին Սերժին:
Արդյո՞ք այդ մարտավարությունը կաշխատի նաև գալիք ընտրություններում:
Միանշանակ չէ»:
