Իրանի և Թուրքիայի նախագահներ Մասուդ Փեզեշքիանը և Ռեջեփ Թայիփ Էրդողանը քննարկել են տարածաշրջանում տիրող իրավիճակը։ Այս մասին հայտնում է Daily Sabah-ը՝ հղում անելով Թուրքիայի նախագահի մամուլի ծառայությանը։
Փեզեշքիանի ընտրությունից հետո երկու ղեկավարների առաջին հանդիպումը տեղի է ունեցել երեկ՝ Նյու Յորքում, ՄԱԿ-ի Գլխավոր ասամբլեայի նստաշրջանի կուլուարներում։
Էրդողանը նշել է, որ կարևոր է քայլեր ձեռնարկել, որոնք կծառայեն խաղաղությանը և ուղղված կլինեն Իսրայելի ագրեսիայի դեմ, որը սպառնում է տարածաշրջանային անվտանգությանը։
Միջազգային հանրությունը, նրա խոսքով, պետք է ավելի հաճախ բարձրացնի այդ խնդիրը՝ հենվելով միջազգային իրավունքի, դիվանագիտության և մարդու իրավունքների վրա, «որպեսզի հնարավորինս արագ վերջ տան բռնությանը, որն Իսրայելն իրականացնում է պաղեստինյան և լիբանանյան տարածքներում»:
«Թուրքիան ավելացնում է ջանքերը՝ հումանիտար օգնություն տրամադրելու քաղաքացիական բնակչությանը պաղեստինյան տարածքներում, հատկապես Գազայի հատվածում»,- հայտարարել է Էրդողանը։
Խոսելով Թուրքիայի և Իրանի պատմամշակութային կապերի մասին՝ Էրդողանը վստահություն է հայտնել, որ երկկողմ հարաբերությունները կզարգանան և կամրապնդվեն բոլոր ոլորտներում։
