Բաքվում ԱՄՆ դեսպանը պահանջում է

Սեպտեմբերի 25-ին Բաքվում Միացյալ Նահանգների արտակարգ եւ լիազոր դեսպան Մարկ Լիբին հանդիպել է Ադրբեջանի մարդու իրավունքների պաշտպան Սաբինա Ալիեւային:

Այդ առթիվ վերջինիս գրասենյակի տարածած տեղեկատվությունից տպավորություն է ստեղծվում, թե մարդու իրավունքների եւ հիմնական ազատությունների պաշտպանության հարցում Ադրբեջանը ոչ միայն հավատարիմ է միջազգային պարտավորություններին, այլեւ «զգալի առաջընթաց է գրանցել»:

Վարչախմբի շահերի պաշտպան Ալիեւայի տեղեկատվական կեղծիքն անմիջապես հերքվել է Բաքվում ԱՄՆ դեսպանի անունից սոցիալական X հարթակում արված հետեւյալ կարճ, բայց բազմանշանակ գրառմամբ.

«Ես ուրախ էի հանդիպել Ադրբեջանի օմբուդսմեն Սաբինա Ալիեւային՝ քննարկելու մարդու իրավունքները: Մենք Ադրբեջանին կոչ ենք անում հարգել իր միջազգային պարտավորությունները»: Ասվածը վկայում է, որ ԱՄՆ դեսպանին չեն բավարարել Ադրբեջանի օմբուդսմենի «փաստարկները եւ հիմնավորումները»:

Վաշինգտոնը պնդում է, որ Ադրբեջանը չի հարգում մարդու իրավունքների պահպանման միջազգային պարտավորությունները եւ պահանջում է, որ Բաքուն կատարի դրանք: Մարդու իրավունքների հարցը քննարկվել է նաեւ ԱՄՆ պետքարտուղար Բլինքենի եւ Ադրբեջանի նախագահ Ալիեւի հեռախոսազրույցի ընթացքում:

Թիվ 1 սյունակ, Վահրամ Աթանեսյան