Աբխազիայի դե-ֆակտո առաջնորդ Ասլան Բժանիան հանդես է եկել հայտարարությամբ, որտեղ սուր քննադատության է ենթարկել Ռուսաստանի եւ Վրաստանի միջեւ համեմատություն անցկացնող «որոշ քաղաքական գործիչների»:
Բժանիայի գնահատմամբ՝ Ռուսաստանն «Աբխազիայի եղբայրն է եւ նպաստում է նրա պետականության կայացմանը, տնտեսական ինքնուրույնությանը, որ ամեն ինչի հիմքն է»․-այդ մասին հայտնում է Civil.ge-ն:
Սեպտեմբերի 1-ից Ռուսաստանը դադարեցրել է Աբխազիայի բյուջեին լրավճարի հատկացումը, այդ պատճառով հազարավոր ծերեր կարող են զրկվել կենսաթոշակից:
Հայտնի չէ, թե պետական համակարգում ծառայողներն ինչ միջոցների հաշվին են աշխատավարձ ստանալու: Աբխազիայի հանրության մի զգալի մասի կարծիքով՝ Ռուսաստանը «գաղութատիրական քաղաքականություն է վարում եւ դիմել է տնտեսական պատժամիջոցների, քանի որ կառավարությանը ներկայացված պահանջները ժողովրդի ճնշման տակ չեն կատարվել»:
Ասլան Բժանիան փաստացի հաստատել է, որ աբխազական երիտասարդ սերունդն ավագներին քննադատում է, որ «մտադիր են Աբխազիան մտցնել Ռուսաստանի կազմ»:
Նա հերքել է այդ խոսակցությունները եւ հավաստիացրել, որ «հանրապետությունը կզարգացնի անկախ պետականությունը»: Անկախ աղբյուրները հայտնում են, որ Աբխազիայում սրվում են միջէթնիկ հակասությունները:
Չճանաչված հանրապետության ոչ աբխազ բնակչության մեծամասնության համար էական չէ, թե Աբխազիան ինչ կարգավիճակ կունենա: Դա կարող է նրանց նկատմամբ խտրական վերաբերմունքի պատճառ դառնալ: Աբխազիայում տասնյակ հազարավոր հայեր են ապրում: Առայժմ որեւէ տեղեկություն չկա, թե ներքաղաքական լարված իրավիճակում նրանք ինչ կողմնորոշում ունեն:
Թիվ 1 սյունակ, Վահրամ Աթանեսյան
