Ադրբեջանի «Մամուլի խորհրդի» վարչության անդամ Ֆարհադ Փարդաշունասն ահազանգել է, որ ղարաբաղյան երկու պատերազմում սպանված ավելի քան 3000 դրբեջանցի զինվորականների անուններ «Վիքիպեդիայից» ջնջվել են:
Նա դիմել է ՊՆ-ին, ներքին գործերի նախարարությանը եւ Պետական անվտանգության ծառայությանը, որպեսզի քննության անցկացվի եւ պարզվի, թե ինչու՞ «Վիքիպեդիայի» ադրբեջանական խմբագրությունը «միտումնավոր տարբերություն է դնում զոհերի միջեւ եւ այդքան մարդու հիշատակն անարգում»:
Ըստ երեւույթին, իշխանության համապատասխան ատյաններից նրան զգուշացրել են, որպեսզի սոցիալական ցանցերում կատարած գրառումները հեռացնի, բայց տեղեկությունն արդեն տարածվել է եւ, ինչպես անկախ աղբյուրներն են վկայում, փաստը «հանրային լուրջ բողոքի տեղիք է տվել»:
«Վիքիպեդիայի» ադրբեջանական խմբագրությունն իր հերթին Փարդաշունասին մեղադրել է «հայրենիքի համար նահատակվածների հիշատակը քաղաքական նպատակների ծառայեցնելու» մեջ:
Որքանով հասկացվում է՝ Ադրբեջանի ՊՆ-ն հետապնդել է պատերազմում սպանվածների թվաքականակը «Վիքիպեդիայում» կրճատված ցույց տալու նպատակ:
Քառասունչորսօրա պատերազմում Ադրբեջանը պաշտոնապես հայտարարել է ոչ ավելի, քան երեք հազար սպանվածի մասին եւ, հաշվի առնելով, որ այդ երկրում ամեն ինչ որոշում է իշխանությունը, որեւէ աղբյուր այլ տվյալներ չի կարող հրապարակել: Իշխանությանը հաջողվել է լռեցնել «քաղաքական խառնակչին»:
Իսկ ի՞նչ կասի հանրությունը կամ գոնե նրա այն հատվածը, որ պատերազմին մարդկային կորուստներ է տվել:
Թիվ 1 սյունակ, Վահրամ Աթանեսյան
