ԱՄՆ պետքարտուղար Էնթոնի Բլինքենը բարձր է գնահատել առաջընթացը, որ ձեռք է բերվել Հայաստանի և Ադրբեջանի կողմից կայուն և արժանապատիվ խաղաղության ճանապարհին, և երկու երկրներին հետագա առաջընթացի կոչ է արել՝ որքան հնարավոր է շուտ հասնելու խաղաղության համաձայնագրին։
Այս մասին ասված է Պետդեպարտամենտի հաղորդագրության մեջ։
Պետքարտուղարն ընդգծել է, որ խաղաղության համաձայնագիրը տարածաշրջանին կբերի կայունություն և բարգավաճում։
Հիշեցնենք, որ երեկ Նյու Յորքում ՄԱԿ-ի Գլխավոր ասամբլեայի բարձր մակարդակի շաբաթվա շրջանակներում պետքարտուղար Էնթոնի Բլինքենը եռակողմ հանդիպում է ունեցել Հայաստանի արտգործնախարար Արարատ Միրզոյանի և Ադրբեջանի արտգործնախարար Ջեյհուն Բայրամովի հետ։
