ՀՀ Ազգային ժողովի ֆինանսավարկային և բյուջետային հարցերի հանձնաժողովը հավանություն տվեց Հայաստանի Հանրապետության ու Վերակառուցման և զարգացման միջազգային բանկի միջև «Կանաչ, կայուն և ներառական զարգացման քաղաքականության երկրորդ գործառնություն» ֆինանսավորման համաձայնագիրը վավերացնելու մասին նախագծին, որն, ըստ էության, շուրջ 92 մլն եվրո վարկ ներգրավելու մասին է:
Նախագիծը ներկայացրեց ՀՀ ֆինանսների փոխնախարար Էդուարդ Հակոբյանը:
«Խոսը 92.3 մլն եվրո վարկի մասին է: Այս վարկի ներգրավմանը զուգահեռ արդեն ունենք պայմանավորվածություն, որ 16 մլն դոլար գրանտ է ներգրավվելու նույն հիմնադրամից, որը գերթիրախային է, դա ծառայելու ԼՂ մեր հայրենակիցների համար իրականացվող ծրագրերի ֆինանսավորմանը»,-ասաց Էդուարդ Հակոբյանը:
Վարկի մարման ժամկետը 22 տարի է, որից 8 տարին՝ արտոնյալ:
Փոխնախարարը ներկայացրեց իրականացված մի քանի կարևոր միջոցառումներ: Շենքերում և ենթակառուցվածքներում կլիմայի փոփոխության նկատմամբ դիմակայունությունն ու էներգաարդյունավետությունն ուժեղացնելու համար սահմանվել են նոր շինարարական նորմեր:
«Այն բոլոր շենքերը, որոնք այսուհետ կառուցվելու են, լինելու են այդ նորմերի պահպանմամբ: Դրանք թույլ են տալու հարմարվել կլիմայի փոփոխությանն առաջիկա տարիների ընթացքում»,-ասաց Հակոբյանը:
Ինչ վերաբերում է Լեռնային Ղարաբաղից բռնի տեղահանված հայրենակիցներին, ապա ֆիքսել են երկու կարևոր միջոցառում:
«Մեկ տարի ժամանակով ժամանակավոր պաշտպանության կարգավիճակի տրամադրումն էր, որն իրականացվեց:
Նաև ԼՂ մեր հայրենակիցներին աշխատանքի շուկայում ներգրավումն էր: Տվյալ դեպքում պետությունը կարևոր քայլ իրականացրեց և նրանց մի մասին վերցրեց պետական, մասնավորապես կրթական ու առողջապահական համակարգում աշխատանքի: Այս հենքով էլ այդ 16 մլն գրանտը կարողացել ենք մոբիլիզացնել»,-նշեց նա:
Ըստ ներկայացված նախագծի՝ համաձայնագրի կնքումը միտված է Հայաստանում կանաչ, դիմակայուն և ներառական զարգացման խթանմանը, բնապահպանական կառավարման ոլորտը կարգավորող իրավական շրջանակի բարելավմանը, մարդկային կապիտալի զարգացմանը, հակակոռուպցիոն և արդարադատության ոլորտների արդյունավետության բարձրացմանը:
