2024 թ. 61 մլրդ դրամից ավելի եկամուտներ ենք հավաքագրել. Ավինյան

Երևանի քաղաքապետ Տիգրան Ավինյանը 2025թ. պետբյուջեի նախնական քննարկման ժամանակ հայտարարել է, որ Երևանը 2024թ., 2023-ի համեմատ, սեփական եկամուտները էականորեն ավելացրել է․

«Երևանի քաղաքապետարանը 2024թ. 61 մլրդ դրամից ավել եկամուտներ է հավաքագրել՝ 2023թ. 39 մլրդ դրամի համեմատ։ Ի հավելումն, փորձել ենք նաև ծրագրերի ծավալն ընդլայնել»,- ասաց նա։

Քաղաքապետի խոսքով՝ քաղաքապետարանը վերջին տարիներին սկսել է իրականացնել այնպիսի ենթակառուցվածքային ծրագրեր, որոնք նախկինում երբևէ չեն արվել.

«Մասնավորապես, վերջին 2 տարվա ընթացքում սկսվել է 14-15 կմ կոյուղու փոխարինումը, որը քաղաքապետարանի ֆորմալ գործառույթը չէ։ Երևանի քաղաքապետարանը սեփական եկամուտներով որոշակի բյուջե է ներդրել՝ տարվա կտրվածքով ծախսելով մոտավորապես 1.5-1.8 մլրդ դրամ։ Այս տարի ամփոփում ենք այդ աշխատանքները»,- ասաց Տիգրան Ավինյանը՝ հավելելով, որ այս տարի քաղաքապետարանի միջոցներով և կառավարության աջակցությամբ իրականացրել են 52 կմ ճանապարհի միջին նորոգման աշխատանքներ։