Վրաստանում՝ Դոնալդ Թրամփին սպասելիս

Թբիլիսիում ԱՄՆ դեսպանատունը հայտնում է, որ դեկտեմբերի 9-ին դեսպան Ռոբին Դանինգանը հանդիպել է Վրաստանի Մարդու իրավունքների պաշտպան Լեվան Իոսիլիանիի հետ, որպեսզի քննարկի ՄԻՊ աշխատակազմի «կարեւորությունը քաղաքացիների իրավունքների պաշտպանության գործում»:

«Նրանք, ովքեր պատասխանատվություն են կրում ցուցարարների, մամուլի եւ ընդդիմության ներկայացուցիչների նկատմամբ դաժան վերաբերմունքի համար, պետք է պատասխանատվության ենթարկվեն: Նրանք, ովքեր օգտվել են հավաքների եւ ազատ կամարտահայտության իրավունքից, պետք է անհապաղ ազատ արձակվեն»,- հայտարարել է Վրաստանում ԱՄՆ դեսպանատունը:

Ավելի վաղ Վրաստանի Մարդու իրավունքների պաշտպանն իրավապահ մարմիններին եւ ուժային կառույցներին հորդորել էր «զագնվածային հետապնդումներ չկիրառել, այլ բացահայտել կարգազանցներին եւ անհատական ազդեցության միջոցներ կիրառել»: Ներքաղաքական իրավիճակի վտանգավորության մասին հայտարարություն է տարածել նաեւ Վրաց ուղղափառ եկեղեցին:

Վրաստանում արդեն տասնմեկ օր է՝ բողոքի ակցիաները չեն դադարում: Ոստիկանությունը տասնյակ անձանց է ձերբակալել, ոմանք ենթարկվել են վարչական կալանքի:

Ըստ տեղեկությունների, ՆԳՆ-ն քրեական գործեր հարուցելու համար նյութեր է նախապատրաստում: Իշխող կուսակցության գործադիր քարտուղար Մամուկա Մդինարաձեն ասել է, որ կառավարությունը հանրային ծառայության մասին օրենսդրության փոփոխություններ է նախաձեռնում:

Նրա կարծիքով՝ դա թույլ կտա «առողջացնել հանրային ծառայության ոլորտը»: Անկախ փորձագետները համարում են, որ իշխող կուսակցությունը ձգտում է «հանրային ծառայության ասպարեզը մաքրել այլախոհներից»:

Վերջին օրերին մի շարք նախարարությունների հարյուրավոր աշխատակիցներ հայտարարել են, որ կառավարությունը պետք է վերադառնա Վրաստանի եվրաինտեգրման սահմանադրական ուղեգծին:

«Մտավարի արխի» հեռուստաընկերության տեղեկացվածությամբ՝ իշխող կուսակցությունն ունի դեկտեմբերի 29-ին Միխեիլ Կավելաշվիլիին «նշանակել նախագահ»: Գործող նախագահ Սալոմե Զուրաբիշվիլին հայտարարել է, որ կմնա պաշտոնին՝ մինչեւ խորհրդարանական նոր ընտրություններ չանցկացվեն: Այդ սցենարը բացառելու համար, ըստ «Մտավարի արխիի», իշխանությունը Կավելաշվիլիին «նախագահ նշանակելուց հետո կհայտարարի արտակարգ դրություն եւ Թբիլիսիում կմտցնի պարետային ժամ»:

Որքանո՞վ է հավաստի կամ գոնե իրականությանը մոտ այս տեղեկությունը՝ հեռուստաընկերությունն աղբյուրներ չի վկայակոչել: Վարչապետ Կոբախիձեն ասել է, որ Զուրաբիշվիլին պետք է ենթարկվի սահմանադրությանը եւ հեռանա: Հայտնի է դարձել, որ խորհրդարանը քննարկում է պետական բարձրաստիճան պաշտոնյաներին պահպանությունից զրկելու մասին օրինագիծ, եթե նրանք «խախտում են սահմանադրությունը»:

Դա ակնհայտորեն վերաբերում է Զուրաբիշվիլիին, որ կզրկվի պահպանությունից, եթե պնդի, որ մնում է ընտրված նախագահ: Վրաստանի վարչապետը միաժամանակ ասել է, որ ԱՄՆ ընտրված նախագահ Թրամփի պաշտոնամուտից հետո «ամեն ինչ լավ կլինի»:

Ի՞նչ հիմք ունի այդ լավատեսությունը: ԱՄՆ պետական դեպարտամենտը վրացի մի քանի պաշտոնյաների նկատմամբ արդեն իսկ պատժամիջոցներ է կիրառել:

Ըստ վիճակագրական պաշտոնական տվյալների, ընթացիկ տարում Վրաստանում մոտ հիսուն տոկոսով կրճատվել են արտաքին ուղղակի ներդրումները: Միացյալ Նահանգները Վրաստանի հետ ռազմավարական համագործակցությունը դադարեցրել է: Ռուսաստանի ԱԳՆ պաշտոնական ներկայացուցիչ Զախարովայի բնութագրմամբ՝ Մոսկվան պատրաստ է ընդառաջ գնալ այնքան, որքան պատրաստ է Թբիլիսին: Դա նշանակում է, որ Ռուսաստանը Վրաստանին «ոչինչ պարտք չէ»:

Թիվ 1 սյունակ, Վահրամ Աթանեսյան