Տխուր պատկեր կլինի, եթե Զուրաբիշվիլիին ուժով դուրս հանենք նստավայրից և բանտ տեղափոխենք. Կոբախիձե

Վրաստանի վարչապետը չափազանց քիչ հավանական է համարում սցենարը, որի դեպքում իշխանությունները ստիպված կլինեն Սալոմե Զուրաբիշվիլիին վտարել Օրբելիանիի պալատից ընտրված նախագահ Միխեիլ Կավելաշվիլիի երդմնակալությունից հետո, որի լեգիտիմությունը չեն ճանաչում ոչ գործող նախագահը, ոչ էլ ընդդիմությունը։ Այդուհանդերձ, Իրակլի Կոբախիձեն չի բացառում նաև իրադարձությունների նման զարգացումը` ընդգծելով, որ այդ դեպքում Սալոմե Զուրաբիշվիլիին կարող է սպառնալ քրեական պատիժ։

«Կարծում եմ, որ այս դեպքում Սալոմե Զուրաբիշվիլին խելամիտ կվարվի։ Ուզում եմ հիշեցնել, որ սա չի կարող լինել Մելիայի սցենարի կրկնություն (2021թ. «Ազգային շարժման» նախկին առաջնորդ Նիկա Մելիան ձերբակալվել էր կուսակցության գրասենյակում)։ Սա կուսակցական գրասենյակ չէ, սա Վրաստանի նախագահի նստավայրն է, ուստի նույն սցենարն այստեղ խաղարկելը նշանակում է քրեական հանցագործություն կատարել, որը նախատեսում է երկար տարիների ազատազրկում ոչ միայն հենց Սալոմե Զուրաբիշվիլիի, այլև ցանկացած անձի համար, ով կներգրավվի այդ սցենարում: Ուստի ես չեմ կարծում, որ Սալոմե Զուրաբիշվիլին առաջին հերթին իրեն կզոհաբերի հանուն բանտի, ինչպես նաև կզոհաբերի 100-150 մարդու, որոնց կարելի է ասոցացնել նրա հետ։ Հետևաբար ես չեմ սպասում նման անհիմն սցենարի զարգացում»,- լրագրողներին ասել է Կոբախիձեն։

Կառավարության ղեկավարն ընդգծել է, որ «շատ տխուր պատկեր կլինի», եթե իշխանությունները ստիպված լինեին Սալոմե Զուրաբիշվիլիին ուժով դուրս հանել նստավայրից և «տեղափոխել քրեակատարողական հիմնարկ»։

Միաժամանակ Կոբախիձեն նշել է, որ իր պարտքն է համարում «զգուշացնել Սալոմե Զուրաբիշվիլիին հանցագործության կատարումից»։