Այսօր Թրամփի երդմնակալության օրն է

236 տարի առաջ Ջորջ Վաշինգտոնը դարձավ Միացյալ Նահանգների առաջին նախագահը, և այդ ժամանակից ի վեր ամերիկացի առաջնորդների երդմնակալության արարողությունը դարձել է կանոնավոր իրադարձություն, որը գրավում է ողջ աշխարհի ուշադրությունը։

Այս տարի հունվարի 20-ին իր երդմնակալության ժամանակ Դոնալդ Թրամփը երկրորդ անգամ կդառնա Միացյալ Նահանգների նախագահ, և միակը Գրովեր Քլիվլենդից հետո (որը ղեկավարում էր երկիրը 19-րդ դարի վերջին), ով կարողացավ կրկին վերնընտրվել դադարից հետո:

«Ամեն ինչ կսկսվի վաղվանից։ Վաղը շատ կզվարճանաք հեռուստացույց դիտելով»,- նապօրեին մեկնաբանել էր արարողությունը նորընտիր նախագահը։

Ցուրտ եղանակի պատճառով Թրամփը ուրբաթ օրը հայտարարեց, որ երդմնակալությունը կանցկացվի ԱՄՆ Կապիտոլիումի ռոտոնդայի ներսում, ոչ թե դրսում, ինչպես ընդունված է, իսկ արարողությունը և շքերթը ուղիղ եթերով կհեռարձակվեն Վաշինգտոնի Capital One Arena-ից: Երկուշաբթի սպասվում է ավելի ցուրտ եղանակ, քան կիրակի օրը, կա ձյան տեղումների մեծ հավանականություն։ Վերջին անգամ երդմնակալության արարողությունը ցրտաշունչ ջերմաստիճանի պատճառով տեղափոխվել է ներս՝ Ռոնալդ Ռեյգանի համար 1985 թվականին:

Երդմնակալության օրը սկսվում է Սուրբ Ջոնս եկեղեցում առավոտյան ժամերգությամբ, որին կհաջորդի Սպիտակ տանը Բայդենների հետ ավանդական թեյը։

Թրամփն ձեռքը կդնի Աստվածաշնչին և կարտասի 35 բառից բաղկացած նախագահական երդումը՝ խոսք տալով պահպանել Միացյալ Նահանգների Սահմանադրությունը։

Երկուշաբթի երեկոյան տեղի կունենա երդմնակալության երեք պաշտոնական պարահանդես. այս թիվը չի կարելի շատ համարել՝ հաշվի առնելով, որ 2009-ին Օբաման անցկացրեց 10 պարահանդես, իսկ 1997-ին Քլինթոնը՝ 14-ը: 2021 թվականին Բայդենը համաճարակի պատճառով նրանցից ոչ մեկին չի մասնակցել։

Թրամփը պատմության մեջ ամենատարեցն է, ով ստանձնել է նախագահի պաշտոնը՝ 78 տարեկան 220 օրական: Նա հինգ ամսով մեծ է, քան Բայդենը 2021 թվականին երդման արարողության ժամանակ։