Ռոբերտ Քոչարյանի որդին՝ «Հայաստան» խմբակցության պատգամավոր Լևոն Քոչարյանը հայտարարել է, թե ինքը պատրաստ է հանդիպել 2008թ․ մարտի 1-ի զոհերի հարազատներին։ Նա անդրադարձել է նաև «Մարտի 1»-ի գործին, որի շրջանակներում մեղադրանք է առաջադրվել ՀՀ երկրորդ նախագահին.
«Ես չեմ համարում ինձ մեղավոր, առավել ևս, գործն ինքն իրենով սպանությունների համար չէ»։ Նա նշել է, որ մարտի 1-ի իրադարձությունների ժամանակ 23 տարեկան է եղել և չի զբաղվել քաղաքականությամբ։
Քոչարյանն անդրադարձել է նաև Սերժ Սարգսյանի աջակիցիների հետ սոցիալական ցանցերում բանավեճերին, ասել է, որ դրանք ուղղորդված չեն. «Մեզ մոտ չկան կուսակցություններ, չկան կառույցներ, չկան ձեր սիրած շրջաբերականներից, ուղղակի մարդիկ են, որ ունեն մեծ հարգանք հորս հանդեպ, մեր քաղաքական թիմի հանդեպ և ունեն դիրքորոշում ուրիշ հարցերում, բայց սա չի նշանակում, որ նրանց դիրքորոշումը մերն է»։
Հարցին՝ Ռոբերտ Քոչարյանի ու Սերժ Սարգսյանի միջև կա՞ լարվածություն, նա ժխտական պատասխան է տվել։
