Ուկրաինայի հակամարտությունը չի կարող լուծվել 100 օրում, եթե ԱՄՆ-ի մոտեցման մեջ իրատեսություն չներարկվի, հայտարարել է Ռուսաստանի արտաքին գործերի փոխնախարար Սերգեյ Ռյաբկովը։
«Առաջին հերթին ցանկանում եմ հասկանալ, թե ինչ հիմքով է ամերիկյան կողմը մտադիր գնալ կարգավորման։ Եթե այն ազդակների հիմքով, որոնք մենք լսում ենք վերջին օրերին, ապա դա չի տացվի ո՛չ 100, ոչ էլ ավելի օրից։ Իսկ եթե Վաշինգտոնի մոտեցման մեջ ավելի շատ իրատեսություն լինի, ապա, հավանաբար, կսկսվի որոշակի գործընթաց, որի տեմպերը նույնպես այսօր դժվար է կանխատեսել»,- ասել է նա։
The Wall Street Journal-ի հրապարակման համաձայն՝ ԱՄՆ նախագահ Դոնալդ Թրամփը Ուկրաինայի հարցով իր հատուկ բանագնաց Քիթ Քելլոգին հանձնարարել է 100 օրում ավարտել ուկրաինական հակամարտությունը։
Այնուամենայնիվ, ինչպես նշել է պարբերականը, Պուտինի հետ գործարքը շատ ավելի բարդ խնդիր է Թրամփի համար, քան նա պատկերացնում էր՝ նախընտրական արշվի ժամանակ, երբ հայտարարում էր, թե շատ արագ վերջ կդնի հակամարտությանը։
