Քաղաքապետարանի գործակարգավարական նիստում զեկուցվել է, որ հունվարին օդում չտարբերակված փոշու քանակությունը գերազանցել է 2 անգամ։
Քաղաքապետ Տիգրան Ավինյանը, արձագանքելով զեկույցին, նշել է. «Մեր հաջորդ կարևոր գործողությունների ծրագիրը նվիրված է լինելու օդու որակի և առհասարակ օդում առկա փոշու հետ կապված անելիքներին։ Բայց Երևանի քաղաքապետարանի անելիքները չպետք է սահմանափակվեն քաղաքապետարանի լիազորություններով, հետևապես, սա մեզ համար պետք է դառնա առաջնային խնդիրներից մեկը»։
Ըստ քաղաքապետի, օդի որակի չափման սարքեր են տեղադրվել ու տեսել են, որ կա խնդիր՝ ինչպես մարդածին, այնպես էլ ոչ մարդածին պատճառներով. «Այդ ուղղությամբ պետք է գործուն քայլեր ձեռնարկենք»,- ասել է նա՝ հանձնարարելով քառամյա ծրագիր կազմել այդ ուղղությամբ. «Էն մոտեցումը, որ սա մի նախարարության գործն է, մյուս նախարարության գործը, ինձ համար ընդունելի չէ։ Սա համարում եմ՝ բոլորիս գործն է, և առաջին հերթին՝ Երևանի քաղաքապետարանի անելիքը»։
