Լոնդոնում մեկնարկել է Ուկրաինայի հարցով եվրոպական գագաթնաժողովը

Ուկրաինայի հարցով եվրոպական գագաթնաժողովը մեկնարկել է Լոնդոնի կենտրոնական Լանքասթեր Հաուսում։ Հանդիպմանը, որը կազմակերպել է Մեծ Բրիտանիայի վարչապետ Քիր Սթարմերը, մասնակցում են 18 երկրի ու ասոցիացիայի ներկայացուցիչ։

Միջոցառմանը մասնակցում են Գերմանիայի, Դանիայի, Իսպանիայի, Իտալիայի, Կանադայի, Նիդերլանդների, Նորվեգիայի, Լեհաստանի, Ռումինիայի, Ֆինլանդիայի, Ֆրանսիայի, Չեխիայի, Շվեդիայի ղեկավարները, ինչպես նաև Եվրոպական հանձնաժողովի ղեկավար Ուրսուլա ֆոն դեր Լայենը, Եվրոպական խորհրդի նախագահ Անտոնիու Կոշտան, ՆԱՏՕ-ի գլխավոր քարտուղար Մարկ Ռյուտեն և Վլադիմիր Զելենսկին։ Թուրքիան ներկայացնում է ԱԳ նախարար Հաքան Ֆիդանը։ Գագաթնաժողովի մասնակիցների թվում է նաև Լոնդոնում Ուկրաինայի դեսպանը:

Հանդիպումից առաջ գրասենյակը տեղեկացրել է, որ գագաթնաժողովի մասնակիցները կկենտրոնանան Ուկրաինայի դիրքերի ամրապնդման վրա՝ ներառյալ Կիևին ռազմական մատակարարումները և Ռուսաստանի վրա «տնտեսական ճնշումը»։

Կիրակի առավոտյան BBC-ին տված հարցազրույցում Սթարմերն ասել է, որ գագաթնաժողովը կկենտրոնանա «բարի կամքի» ռազմական կոալիցիայի ձևավորման վրա՝ հակամարտությունը կարգավորելուց հետո Ուկրաինայի անվտանգությունն ապահովելու համար:

Նրա խոսքով՝ հանդիպման մասնակիցները կքննարկեն «Ուկրաինայի համար անվտանգության երաշխիքներ տրամադրելու» ուղիները՝ «տևական խաղաղության» հասնելու համար։ Սթարմերը նշել է, որ խոսքը «բարի կամքի կոալիցիա» ստեղծելու մասին է, որը կներառի ոչ թե ՆԱՏՕ-ի անդամ բոլոր երկրները, այլ միայն այն պետությունները, որոնք ցանկություն կհայտնեն մասնակցել դրան։ Նա հավելել է, որ «մինչ այժմ Մեծ Բրիտանիան և Ֆրանսիան ավելի առաջ են գնացել, քան մյուսները՝ քննարկելով այս հարցը»։