Կրեմլը համաձայնել է օգնել ԱՄՆ-ին Իրանի հետ բանակցություններում

Կրեմլը համաձայնել է օգնել ԱՄՆ-ին Իրանի հետ բանակցություններում, այս մասին մարտի 4-ին հայտնել է Bloomberg-ը՝ հղում անելով իր աղբյուրներին։ Այս բանակցությունները վերաբերում են, մասնավորապես, Իսլամական Հանրապետության միջուկային ծրագրին, ինչպես նաև Թեհրանի կողմից Մերձավոր Արևելքում հակաամերիկյան ուժերին ցուցաբերվող աջակցությանը։

Bloomberg-ի տեղեկություններով, Դոնալդ Թրամփը հայտնել է իր հետաքրքրվածության մասին, երբ փետրվարի 12-ին հեռախոսազրույց է ունեցել Վլադիմիր Պուտինի հետ։ Այս հարցը քննարկվել է նաև մի քանի օր անց Էր-Ռիյադում կայացած բանակցությունների ընթացքում, պնդում են Bloomberg-ի մոսկովյան աղբյուրները։

Սպիտակ տունը չի պատասխանել մեկնաբանության խնդրանքին։ Վլադիմիր Պուտինի մամուլի քարտուղար Դմիտրի Պեսկովը լրագրողներին հայտնել է, որ Մոսկվան «պատրաստ է անել ամեն ինչ, ինչ իր ուժերի սահմաններում է», որպեսզի Վաշինգտոնն ու Թեհրանը կարողանան լուծել բոլոր խնդիրները բանակցությունների միջոցով։