Վաշինգտոնը կարծում է, որ Թեհրանը պետք է նստի բանակցությունների սեղանի շուրջ

Թեհրանը գործողությունների մեծ ազատություն չունի և ստիպված կլինի երկխոսության մեջ մտնել Միացյալ Նահանգների հետ, Fox Business-ին ասել է Պետդեպարտամենտի խոսնակ Թեմմի Բրյուսը։

«Իրանը քիչ տարբերակներ ունի: Մենք լուրջ ենք տրամադրված, նրանք գիտեն, որ նախագահը լուրջ է տրամադրված, պետքարտուղար Մարկո Ռուբիոն լուրջ է տրամադրված, և Իրանը ստիպված կլինի գալ բանակցությունների սեղանի շուրջ», – ասել է Բրյուսը:

Ավելի վաղ՝ մարտի 24-ին, Իրանի արտգործնախարար Աբբաս Արաղչին հայտարարել էր ԱՄՆ-ի հետ անուղղակի բանակցություններ վարելու հնարավորության մասին։

«Վաշինգտոնի հետ ուղղակի բանակցություններ չեն լինի այնքան ժամանակ, քանի դեռ ԱՄՆ-ն «չփոխի իր մոտեցումը Իրանի Իսլամական Հանրապետության նկատմամբ», – հավելել է նա։

2025 թվականի փետրվարին Թրամփը ստորագրել է գործադիր հրաման՝ վերականգնելով Իրանի դեմ առավելագույն ճնշման քաղաքականությունը։ Թրամփն ասել է, որ մտադիր չէ իրավիճակը հասցնել Իրանի հետ զինված առճակատման և կցանկանար համաձայնություն կնքել Թեհրանի հետ Իրանի միջուկային խնդրի շուրջ՝ առճակատումից խուսափելու համար։