Մոսկվայի կենտրոնում հրաձգություն բացած անհայտ անձը միայնակ է գործել։ Այս մասին լրագրողներին հայտնել են ԱԴԾ-ում։ Այնտեղ նաեւ հերքել են ԶԼՄ-ների այն տեղեկատվությունը, որ հրաձիգները երեքն են եղել, եւ հայտնել են, որ Լուբյանկայում ԱԴԾ շենք ներխուժում չի եղել։ Հրաձիգը սպանվել է, հայտնում է ՏԱՍՍ-ը։
Ավելի վաղ մի շարք ԶԼՄ-ներ հայտնել էին այն մասին, որ «երեք անհայտ անձինք ներխուժել են ԱԴԾ ընդունարանի շենք եւ կրակ բացել։ Ընդունարանի պահակների հետ հրաձգության ժամանակ հարձակվողներից երկուսը սպանվել են։ Իսկ նրանցից մեկը փախել է փողոց, որտեղ շարունակել է կրակել։ Դրա հետեւանքով սպանվել է ընդունարանի շենքի դիմաց հերթապահող Պետավտոտեսչության աշխատակիցը»։ Որոշ ժամանակ անց «Մոսկվա» գործակալությունը հանել էր իր նյութը, որտեղ հղում կատարելով ԱԴԾ հասարակայնության հետ կապերի կենտրոնին, հայտնել էր երեք հարձակվողների մասին, տեղեկացնում է Meduza-ն։
Դեկտեմբերի 19-ի երեկեյան հայտնի է դարձել, որ անհայտ անձը կրակ է բացել Մոսկվայի կենտրոնում Մեծ Լուբյանկա փողոցի 12 տան մոտ։
Միջադեպի հետեւանքով զոհվել է ԱԴԾ աշխատակից։ Նախկինում հայտնել էին, որ ծայրահեղ ծանր վնասվածքներ են ստացել հատուկ ծառայության երկու աշխատակիցներ։ Վերջին տվյալներով՝ հրաձգության հետեւանքով տուժել է հինգ մարդ։
Բացվել է քրեական գործ՝ ՌԴ ՔՕ 317 հոդվածով («Իրավապաշտպան մարմինների աշխատակցի կյանքի դեմ ոտնձգություն»)։
Համացանցում հայտնվել է ԱԴԾ շենքի մոտ հրաձիգի ոչնչացման տեսանյութը։