Եվրոպայի խորհուրդը դիտորդական առաքելություն կուղարկի Թուրքիա

Եվրոպայի խորհրդի տեղական և տարածքային իշխանությունների կոնգրեսը մտադիր է առաքելություն ուղարկել Թուրքիա՝ հետաքննելու «ժողովրդավարական հետընթացի» փաստերն այդ երկրում՝ նկատի ունենալով ընտրված քաղաքապետների համատարած հեռացումները։

Չնայած միջազգային հանրության ուշադրությունը հիմնականում կենտրոնացած է մարտի 23-ին Ստամբուլի քաղաքապետ Էքրեմ Իմամօղլուի ձերբակալության վրա, Եվրախորհուրդը նախատեսել է չանտեսել նաև 2016 թվականից ի վեր թուրքական համայնքների մոտ 150 ընտրված քաղաքապետի հեռացումները, որոնց հաճախ փոխարինում էին կառավարության կողմից ուղղակիորեն նշանակված անձինք։

«Մենք ցանկանում ենք վերջ տալ քաղաքապետների հեռացումներին ու պաշտոնանկություններին և նրանց փոխարինմանը կառավարության վստահված անձանցով: Մենք նման գործողությունները համարում ենք անօրինական»,- Euronews-ին ասել է Թուրքիայի հարցով կոնգրեսի համազեկուցող Բրայոնի Ռուդկինը: Նա նշել է, որ հարցը ոչ թե իրավական է, այլ ժողովրդավարական:

Ավելի վաղ կոնգրեսի անդամները հռչակագիր են ընդունել՝ կոչ անելով Թուրքիային ազատ արձակել բոլոր կալանավորված քաղաքապետներին և դադարեցնել քաղաքական դրդապատճառներով հետապնդումները։ Կոնգրեսը դատապարտել է Իմամօղլուի բանտարկությունը և քննադատել նրան համալսարանական դիպլոմից զրկելը, որն անհրաժեշտ էր նախագահի ընտրությանը մասնակցելու համար՝ դա համարելով բացահայտ քաղաքական մարտավարություն:

Թուրքիան բացասաբար է արձագանքել Կոնգրեսի գործողություններին։ Երկրի արդարադատության նախարար Յըլմազ Թունչը սոցցանցերում Կոնգրեսի դիրքորոշումն անվանել է «իրավական իրողություններից հեռու» և մեղադրել ԵԽ-ին անաչառության սկզբունքը խախտելու ու Թուրքիայի ներքին գործերին միջամտելու համար։