Ամերիկյան ավիահարվածների արդյունքում սպանվել է Իրանի գլխավոր ռազմավար Քասեմ Սուլեյմանին

Բաղդադում ամերիկյան ավիահարվածների արդյունքում սպանվել է Իրանի հեղափոխության պահապանների կորպուսի «Քուդս» ստորաբաժանման հրամանատար, իրանցի գեներալ Քասեմ Սուլեյմանին, ինչպես նաև Իրաքի Ժողովրդական մոբիլիզացիայի ուժերի փոխհրամանատար Աբու Մահդի Ալ Մուհանդիսը: Տեղեկությունը հաստատել է Իրանի հեղափոխության պահապանների կորպուսը,- տեղեկացնում է CivilNet-ը։

Պենտագոնը հաստատել է, որ Սուլեյմանին սպանվել է ԱՄՆ նախագահ Դոնալդ Թրամփի հրամանով։
Սուլեյմանին ավիահարվածի ժամանակ ավտոմեքենայում է եղել Բաղդադի օդանավակայանում։ Washington Post թերթի տվյալներով՝ մեքենաների շարասյան ուղղությամբ, ենթադրաբար, հարվածներ են հասցրել անօդաչու թռչող սարքերը։
Դիտորդների խոսքով ՝ հարձակումը, որում զոհվել է իրանցի ամենաազդեցիկ զորահրամանատարներից մեկը, կարող է հանգեցնել ԱՄՆ-ի և Իրանի միջև լարվածության կտրուկ սրման:

Իրանի Իսլամական հեղափոխության պահապանների կորպուսում հաստատել են գեներալի մահը՝ հայտնելով, որ նա զոհվել է ամերիկյան ուղղաթիռներից արձակված հարվածի հետևանքով: Ավելի վաղ հաղորդվել էր, որ Բաղդադի օդանավակայանի շրջանում երեք հրթիռ է պայթել: Տեղի ոստիկանությունը հայտարարել է, որ արդյունքում զոհվել է մեկ մարդ, ևս ինը վիրավորվել են:

Թեհրանը կանչել է Շվեյցարիայի դեսպանատան ներկայացուցչին, որը ներկայացնում է Իրանում ԱՄՆ-ի շահերը, որպեսզի բողոք ներկայացնի հարևան Իրաքում պատերազմ հրահրելու համար, հայտնել է երկրի արտաքին գործերի նախարարությունը:

Իրանի հոգևոր առաջնորդ Այաթոլլա Ալի Խամենեին ԱՄՆ-ին սպառնացել Է սարսափելի վրեժխնդրությամբ և երկրում եռօրյա սուգ Է հայտարարել Սուլեյմանիի սպանության համար:

«Նահատակությունը նրա պարգևն է դարձել շարունակական այն գործունեության համար, որով նա զբաղվել է այս բոլոր տարիներին,- ասված է Իրանի առաջնորդի պաշտոնական թվիթերյան էջում:- Թեև նա գնացել է, բայց Ալլահի կամքով, նրա աշխատանքը և նրա ճանապարհը չեն դադարում: Սարսափելի վրեժխնդրությունը սպասում է հանցագործներին, որոնք իրենց կեղտոտ ձեռքերը պղծել են նրա և մյուս նահատակների արյամբ»:

Իրանի արտգործնախարար Ջավադ Զարիֆը տեղի ունեցածը որակել է ծայրահեղ վտանգավոր և հիմար էսկալացիա։ Իրանի կառավարության ներկայացուցիչը հայտարարել է, որ երկրի անվտանգության խորհուրդը արտահերթ նիստ կանցկացնի, որպեսզի քննարկի «հանցավոր հարձակումը»:

Քասեմ Սուլեյմանին նշանակալի ֆիգուր էր իրանական իսթեբլիշմենթում։ «Քուդս» ստորաբաժանումը, որը նա ղեկավարում էր, ենթարկվում է անմիջապես Իրանի գերագույն առաջնորդ այաթոլլա Ալի Խամենեիին։
Ավիահարվածից հետո նավթի համաշխարհային գներն աճել են 4 տոկոսով։

Մանրամասները՝ սկզբնաղբյուր կայքում։