ՀՀ դատախազությունը պահանջում է Մայր աթոռին նվիրված տարածքները վերադարձնել ՊՆ-ին

ՀՀ գլխավոր դատախազությունը ցանկանում է անվավեր ճանաչել ՀՀ պաշտպանության նախարարության և Հայ առաքելական սուրբ եկեղեցու միջև կնքված նվիրատվության պայմանագիրը, որով նախարարությունը եկեղեցուն շենք–շինություններ և հողատարածք էր նվիրել: Այդ մասին տեղեկանում ենք «Դատալեքս» դատական տեղեկատվական համակարգից։

Դատախազությունը հայցադիմումը ՀՀ հակակոռուպցիոն դատարան ներկայացրել է 2025 թ. հուլիսի 30–ին, այն դեռ վարույթ չի ընդունվել: Գործը մակագրված է դատավոր Լիլիթ Դրմեյանին։

Խոսքը վերաբերում է ՀՀ կառավարության 2018 թ. մարտի 29–ի «Հայաստանյաց Առաքելական Սուրբ Եկեղեցուն» գույք նվիրելու մասին որոշմանը:

Ըստ այդ որոշման ՀՀ պաշտպանության նախարարությանն ամրացված Տավուշի մարզի Գետահովիտ գյուղի վարչական տարածքում գտնվող և պետական սեփականություն հանդիսացող 10518.2 քառ. մետր մակերեսով, 518 221 դրամ հաշվեկշռային արժեքով շենք–շինություններն անհատույց օգտագործման իրավունքով նվիրել Հայ առաքելական սուրբ եկեղեցուն:

Անշարժ գույքի նվիրատվության պայմանագիրը կնքվել է 2019 թ. օգոստոսի 30–ին:

«Պարզվել է, որ տվյալ պայմանագիրը կնքվել է օրենսդրության պահանջների խախտմամբ: Ուստի, ՀՀ դատախազության կողմից ներկայացվել են գործարքն անվավեր ճանաչելու և անվավերության հետևանքներ կիրառելու պահանջներ»,– «Հետքին» հայտնել են ՀՀ գլխավոր դատախազությունից: