Մենք ցանկանում ենք մնալ անկախ. Փեզեշքիան

Իրանի նախագահ Մասուդ Փեզեշքիանը հայտարարել է, որ ԱՄՆ-ի և նրա դաշնակիցների ապակառուցողական քաղաքականությունը անընդունելի է Թեհրանի համար, Իրանը աջակցում է ԵԱՏՄ-ի և ԲՐԻԿՍ-ի շրջանակներում կնքված համաձայնագրերին։

Փեզեշքիանը այս հայտարարությունն արել է Բելառուսի պետության ղեկավար Ալեքսանդր Լուկաշենկոյի հետ բանակցությունների ժամանկ։

«Ես հաստատում եմ, որ մենք ունենք ընդհանուր դիրքորոշումներ և տեսակետներ համաշխարհային նշանակության ընդհանուր հարցերի շուրջ, մասնավորապես այն համաձայնագրերի, որոնք ձեռք են բերվել Եվրասիական տնտեսական միության շրջանակներում և ԲՐԻԿՍ-ի շրջանակներում։ Սրանք իսկապես հնարավոր շրջանակներ են, որոնց միջոցով մենք կարող ենք զարգացնել ինչպես երկկողմ, այնպես էլ բազմակողմ հարաբերություններ: Մեզ համար անընդունելի է այն ապակառուցողական միակողմանի մոտեցումը, որը Միացյալ Նահանգները և նրա դաշնակիցները կիրառում են ամբողջ աշխարհում։ Մենք ցանկանում ենք մնալ անկախ՝ և՛ մեր երկիրը, և՛ ձեր երկիրը, և անկախ որոշումների շրջանակներում կարող ենք զարգացնել մեր բարեկամությունն ու համագործակցությունը», – ասել է Իրանի նախագահը։

Նա Իրանի և Բելառուսի դեմ Արևմուտքի պատժամիջոցները անվանել է անօրինական։ «Նրանք մեր երկրի դեմ պատժամիջոցներ են կիրառում ավելի քան 40 տարի, և վերջերս սկսել են պատժամիջոցներ կիրառել նաև ձեր դեմ։ Մենք հասկանում ենք, որ միակ բանը, որը կարող է չեզոքացնել այս բոլոր անօրինական պատժամիջոցները, մեր հարաբերությունների զարգացումն է և գործնականում կիրականացվեն համաձայնագրերը», – ասել է Իրանի նախագահը։