Ռուս-ուկրաինական հակամարտությունը շատ բարդ է կարգավորել. Թրամփ

Ռուս-ուկրաինական պատերազմը վերածվել է անձնային հակամարտության, և այն շատ բարդ է կարգավորել՝ հայտարարել է ԱՄՆ նախագահ Դոնալդ Թրամփը:

«Տեսնենք՝ ինչ կլինի առաջիկա 2 շաբաթում: Բայց եթե նրանք չհանդիպեն, հետևանքներ կլինեն»,- Հարավային Կորեայի նախագահի հետ համատեղ մամուլի ասուլիսում նշել է Սպիտակ տան ղեկավարը: Թրամփը տեղեկացրել է, որ դեռևս չի քննարկել Ուկրաինայի համար անվտանգության հստակ երաշխիքների հարցը, սակայն դրանք պետք է տրամադրի եվրոպական կողմը, իսկ Վաշինգտոնը պատրաստ կլինի աջակցել։

Խոսելով Գազայի հատվածում իրավիճակից՝ Թրամփը կարծիք է հայտնել, թե հակամարտությունը «համոզիչ եզրահանգում» կստանա առաջիկա երկու-երեք շաբաթվա ընթացքում։ Հարցին՝ արդյոք տեղյա՞կ է, որ վերջին ժամերին իսրայելական ուժերը հարվածել են Գազայի հիվանդանոցներից մեկին, ինչի հետևանքով մի քանի տասնյակ մարդ է վիրավորվել և զոհվել, այդ թվում՝ լրագրողներ, Թրամփը պատասխանել է՝ գոհ չէ, որ նման բան է տեղի ունեցել:

«Այնուհանդերձ, ՀԱՄԱՍ-ի մոտ պահվող պատանդները պետք է վերադարձվեն»,- նշել է ԱՄՆ նախագահը:

Նա նաև մտահոգություն է հայտնել Հարավային և Հյուսիսային Կորեաների միջև լարվածության կապակցությամբ:

«Կաշխատենք այդ հարցով: Կարող ենք կողմերի միջև գագաթնաժողով անցկացնել»,- առաջարկել է ԱՄՆ նախագահը: Թրամփը հավելել է՝ կցանկանար, որ այս տարի ինքն ու Հյուսիսային Կորեայի առաջնորդը հանդիպեն։

Նա նշել է, որ հաճախ տարբեր հարցերով շփվում է Կիմ Չեն Ընի հետ: Հարավային Կորեայի նախագահի հետ հանդիպման արդյունքներով Թրամփը նաև տեղեկացրել է, որ Վաշինգտոնին և Սեուլին հաջողվել է առևտրային գործարք կնքել:

Թիվ 1