Իրանի նախագահը ՀՀ-ի հետ հարաբերություններն ընդլայնելու պատրաստակամություն է հայտնել

Իրանի նախագահ Մասուդ Փեզեշքիանը Հայաստանի հետ հարաբերություններն ամրապնդելու և ընդլայնելու վճռականություն է հայտնել։

Ինչպես հայտնում է «Թասնիմ» գործակալությունը, այս մասին Փեզեշքիանը նշել է Հայաստանի նախագահ Վահագն Խաչատուրյանին և վարչապետ Նիկոլ Փաշինյանին ուղղված առանձին ուղերձներում՝ մատնանշելով երկու երկրների քաղաքակրթական և մշակութային կապերը։

Մասուդ Փեզեշքիանը հույս է հայտնել, որ երկու երկրների ղեկավարությունների հովանու ներքո երկկողմ հարաբերությունների ամրապնդման գործընթացը կշարունակի ընթանալ ընդհանուր շահերին և ռազմավարական նպատակներին համապատասխան:

Իրանի նախագահն ընդգծել է նաև վերջին տարիներին Թեհրանի և Երևանի միջև քաղաքական, տնտեսական և մշակութային ոլորտներում արձանագրված առաջընթացը՝ վստահություն հայտնելով, որ երկու կողմի պաշտոնատար անձանց հանձնառությունը կնպաստի երկկողմ կապերի հետագա զարգացմանը:

Փեզեշքիանը նաև նշել է, որ Իրանի և Հայաստանի միջև հարաբերությունների ամրապնդումը կնպաստի ոչ միայն Հայաստանի և Իրանի ժողովուրդների բարգավաճմանը, այլև խաղաղությանն ու կայունությանը ողջ տարածաշրջանում: