Ռուսաստանը և Ուկրաինան դեռ պատրաստ չեն. Վենս

Ռուսաստանը և Ուկրաինան «դեռ պատրաստ չեն» դադարեցնել պատերազմը և հասնել խաղաղության համաձայնագրի՝ չնայած «ամիսներ տևած բանակցություններին» և Դոնալդ Թրամփի «եռանդուն դիվանագիտությանը», – ասել է ԱՄՆ փոխնախագահ Ջ.Դ. Վենսը։

Նա նշել է, որ խաղաղության բանակցությունների խոչընդոտներից մեկը մնում է «ակնկալիքների հիմնարար անհամապատասխանությունը, որտեղ ռուսները հակված են մտածել, որ իրենց մարտադաշտում ավելի լավ են զգում, քան իրականում»։

«Հենց սա է, որ վերջին ամիսներին դժվարացրել է համաձայնության հասնելը»,- ընդգծել է Վենսը։

Փոխնախագահը հավելել է, որ հակամարտության կարգավորման գործընթացի դժվարությունները հիասթափեցնում են Թրամփին և ԱՄՆ վարչակազմին: Այնուամենայնիվ, առայժմ Սպիտակ տան ղեկավարը շարունակում է աշխատել խաղաղության ուղղությամբ և մեծ վստահություն ունի, որ կարող է համաձայնության գալ:

«Կարծում եմ՝ նա կհասնի: Հարցը միայն այն է, թե որքան ժամանակ կպահանջվի», – եզրափակել է Վենսը: