Եվրոպան ստիպված կլինի երկար ժամանակ աջակցել Ուկրաինային․ Պեսկով

Եվրոպան, Ուկրաինային իր թևի տակ վերցնելով, ստիպված կլինի երկար ժամանակ աջակցել նրան։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը՝ ճեպազրույցի ժամանակ մեկնաբանելով ԵՄ երկրների կողմից Կիևի ռեժիմին ցուցաբերվող աջակցությունը։

«Կիևի ռեժիմի տեսքով նման «հաճախորդ» վերցնելով՝ եվրոպացիները ստիպված կլինեն երկար ժամանակ աջակցել նրան», – ասել է Կրեմլի խոսնակը։

Նա նշել է, որ Կիևը հմուտ է «փող մուրալու» և այն այնպես ծախսելու մեջ, որ «հետագայում հետքեր չգտնվեն»։ Պեսկովը կարծում է, որ Ուկրաինայի իշխանությունները այս պրակտիկան կշարունակեն երկար ժամանակ՝ ոչ մեկ, ոչ երկու, ոչ երեք տարի։

Այս առումով՝ Պեսկովը կոչ է արել եվրոպացիներին պատրաստվել։ Նրա կարծիքով, եթե եվրոպական երկրների և Կիևի միջև հարաբերությունները շարունակվեն այնպես, ինչպես հիմա են, նրանք «ստիպված կլինեն ավելի ու ավելի շատ վճարել»։