Ադրբեջանը ՀՀ-ի վերաբերյալ մի շարք հայտարարություններ է արել․ Հաջիև

Բրյուսելում Ադրբեջանի դեսպանատանը կայացած ճեպազրույցում նախագահի օգնական Հիքմեթ Հաջիևը ներկայացրել է Բաքվի դիրքորոշումը ԵՄ-ի հետ կապի, էներգետիկայի և տարածաշրջանային անվտանգության ոլորտներում համագործակցության վերաբերյալ։ EU Today-ի հետ զրույցում Հաջիևը նշել է, որ Ադրբեջանի ներկայիս օրակարգը ներկայացվում է որպես Հարավային Կովկասում «պատերազմում հաղթանակից դեպի խաղաղության հաղթանակ» անցում։

Նրա խոսքով՝ քննարկումների առանցքում գտնվել է «Զանգեզուրի միջանցքը», որը կապվում է ինչպես Ադրբեջանի հետհակամարտային ռազմավարության, այնպես էլ Եվրամիության կապերի խորացման նպատակների հետ։

Նա հավելել է, որ «միջանցքի» ադրբեջանական հատվածի կառուցումն ավարտվելու է 2026 թվականին։ Հաջիևը ընդգծել է, որ Բաքուն «կցանկանար նաև տեսնել Եվրամիությանն այս նոր տրանսպորտային կազմի մաս», այդ թվում՝ ԵՄ-ի «Գլոբալ դարպաս» նախաձեռնության շրջանակում։

«Պատերազմն ավարտվել է Ադրբեջանի համար, և հակամարտությունն ավարտվել է։ Մենք պետք է ամրապնդենք խաղաղությունը և այն դարձնենք երկարատև»,– ասել է նա։

Այս շրջանակում Հաջիևը ընդգծել է, որ Հայաստանը կարող է «փակուղուց» վերածվել տարանցիկ երկրի, քանի որ Արևելք–Արևմուտք և Հյուսիս–Հարավ կապերը ընդլայնվում են։