Ցանկանում են էներգետիկ կախվածության մեջ դնել Թուրքիայից, իսկ հետո կստիպեն փակել Մեծամորի ԱԷԿ-ը

ԼՀԿ ղեկավար Էդմոն Մարուքյանը գրում է․ «Մենք լավ գիտենք, որ էլեկտրաէներգիա արտադրող և այդ առումով ինքնաբավ երկիր ենք, բայց տեսնենք՝ մեզ ինչ են ասում։

«Տաշքենդում մենք ստորագրել ենք փաստաթուղթ 500 միլիոն եվրո արժողությամբ մի նախագծի մասին։ Սա 500 միլիոն եվրոյի ներդրում է ձեր (խմբ․ նկատի ունի Հայաստանի) էլեկտրացանցը վրացական ցանցի հետ միացնելու համար, և մենք արդեն աշխատում ենք Հայաստան-Թուրքիա էլեկտրացանցի վրա: Ինչո՞ւ, որպեսզի դուք ավելի ու ավելի քիչ կախված լինեք Ռուսաստանից ստացվող էներգիայից»,- Բրյուսելում հայ լրագրողների խմբի հետ հանդիպման ժամանակ այս մասին ասել է Եվրամիության ընդլայնման քաղաքականության հարցերով բարձր հանձնակատար Մարթա Կոսը։

Բոլորին հայտնի է, որ Ռուսաստանը մեզ էլեկտրաէներգիա չի մատակարարում։ Հայաստանը իրեն անհրաժեշտ հիմնական էլեկտրաէներգիան ստանում է ատոմակայանից, ինչպես նաև հիդրոէլեկտրակայաններից ու ջերմաէլեկտրակայաններից։ Սակայն մեզ ամեն գնով ցանկանում են նախ էներգետիկ կախվածության մեջ դնել Թուրքիայից, իսկ արդեն դրանից հետո ստիպել փակել Մեծամորի ԱԷԿ-ը, ինչի մասին մենք բազմիցս խոսել ենք։

Եթե իսկապես ցանկանում եք օգնել, ապա աջակցեք, որպեսզի մեր երկրում կառուցենք երկրորդ ատոմակայանը։

Սա հանցագործություն է Հայոց պետականության, մեր ինքնիշխանության ու ժողովրդի դեմ, իսկ այդ գործընթացին աջակցողները Հայաստանը դնում են էներգետիկ կախվածության մեջ Թուրքիայից»։