Թրամփ. Ժամանակն է Ուկրաինայում ընտրություններ անցկացնել

ԱՄՆ նախագահ Դոնալդ Թրամփը հայտարարել է, որ ժամանակն է Ուկրաինայում անցկացնել նախագահական ընտրություններ, և որ Ուկրաինայի քաղաքացիները պետք է ընտրության հնարավորություն ունենան։

«Կարծում եմ՝ այո։ Վաղուց են եղել ընտրությունները։ Գործերը լավ չեն ընթանում։ Այո, կարծում եմ, ժամանակն է։ Կարծում եմ՝ հիմա ընտրություններ անցկացնելու ժամանակն է։ Նրանք օգտագործում են պատերազմը՝ ընտրություններ անցկացնելուց խուսափելու համար, բայց կարծում եմ՝ ուկրաինացի ժողովուրդը պետք է ունենա այդ ընտրությունը։ Եվ գուցե Զելենսկին հաղթի։ Ես չգիտեմ, թե ով կհաղթի։ Բայց նրանք վաղուց ընտրություններ չեն անցկացրել։ Գիտեք, նրանք խոսում են ժողովրդավարության մասին, բայց ինչ-որ պահի դա այլևս ժողովրդավարություն չէ», – ասել է ԱՄՆ նախագահը Politico-ի լրագրողի հետ հարցազրույցում՝ պատասխանելով այն հարցին, թե արդյոք ժամանակն է, որ Ուկրաինան անցկացնի նախագահական ընտրություններ։