Սիդնեյում տեղի է ունեցել ծանր ահաբեկչական հարձակում

Ավստրալիայի Սիդնեյ քաղաքում տեղի է ունեցել ծանր ահաբեկչական հարձակում։ Բոնդայ լողափում, որտեղ կազմակերպված էր հրեական Հանուկա տոնակատարություն, զինված անձինք կրակ են բացել խաղաղ բնակիչների ուղղությամբ։

Նախնական տվյալներով՝ զոհվել է 12 մարդ, այդ թվում՝ մեկ երեխա։ Տուժել է ևս 12 քաղաքացի։ Վիրավորների թվում է Իսրայել–Ավստրալիա հրեական խորհրդի նախագահը և Միջազգային իրավական ֆորումի նախկին ղեկավար Արսեն Օստրովսկին։ Նա ստացել է գլխի հրազենային վնասվածք և, իր հաղորդմամբ, գտնվում է կայուն վիճակում։

Ավստրալիայի իրավապահ մարմինները դեպքը որակել են որպես ահաբեկչական հարձակում՝ հակասեմիտական շարժառիթով։ Կրակոցները հնչել են միջոցառման ընթացքում, երբ լողափում գտնվել են ընտանիքներ, երեխաներ և զբոսաշրջիկներ։ Ըստ պաշտոնական աղբյուրների՝ արձակվել է շուրջ 50 կրակոց։

Հարձակվողներից մեկը վնասազերծվել է ոստիկանության կողմից դեպքի վայրում, մյուսը ձերբակալվել է ծանր վիճակում։ Տարածքում իրականացվում են հակաահաբեկչական և օպերատիվ քննչական գործողություններ։

Դեպքի ընթացքում քաղաքացիական միջամտության արդյունքում մեկ անձ կարողացել է զինաթափել հարձակվողներից մեկին՝ կանխելով հնարավոր նոր զոհերը։ Նրա անունը Ահմեդ ալ-Ահմեդ է։ Նրա գործողությունները բարձր են գնահատվում իրավապահների կողմից։

Ըստ իրավապաշտպան կառույցների տվյալների՝ 2024 թվականի հոկտեմբերից մինչև 2025 թվականի սեպտեմբերը Ավստրալիայում գրանցվել է 1 654 հակասեմիտական միջադեպ։ Վերջին ահաբեկչությունը տեղի է ունենում այդ վտանգավոր միտումների խորացման ֆոնին։

Դեպքը դատապարտվել է միջազգային հանրության կողմից։ Ավստրալիայի իշխանությունները հայտարարել են հրեական համայնքների անվտանգության լրացուցիչ միջոցառումների կիրառման մասին։

Սիդնեյում տեղի ունեցած ահաբեկչությունը հերթական անգամ ցույց է տալիս, որ կրոնական և ազգային հողի վրա ատելության դրսևորումները շարունակում են լուրջ սպառնալիք հանդիսանալ նույնիսկ այն երկրներում, որոնք երկար տարիներ դիտարկվել են որպես անվտանգ և հանդուրժող հասարակություններ։