Մի նամակը 7 հոգով չեն հասկանում․ Սուքիասյանը ճշտեց, թե երբ է լինելու զոնայավորումը

Կադաստրի կոմիտեի ղեկավար Սուրեն Թովմասյանը Ազգային ժողովի արտահերթ նիստում ներկայացրեց մինչև 2021թ․ օդային լուսանկարների իրականացումը, կառուցված ինքնակամ շինությունների հետ կապված հարցը, որոնք օրենսդրական փոփոխությունների արդյունքում պետք է կառուցապատողների կողմից հաշվառվեին, սակայն ինչ-ինչ պատճառներով չեն հաշվառվել, և բովանդակային առումով բաց են թողնվել այն ժամկետները, որոնք սահմանված էին տարբեր բնակավայրերի համար։

Ըստ այդմ՝ օրենսդրական փաթեթ է նախաձեռնվել, որը մեկ տարի ժամկետով՝ մինչև 2026 թվականի դեկտեմբերի 31-ը, կտա հնարավորություն քաղաքացիներն՝ հաշվառելու իրենց ինքնակամ կառույցները։

Թեմայի վերաբերյալ հարց ուղղեց ՔՊ խմբակցության պատգամավոր Խաչատուր Սուքիասյանը՝ հետաքրքրվելով, թե արդյոք դրանք մտնում են 60-րդ հոդվածի մեջ՝ հաշվի առնելով, որ ՀՀ-ում շատ նման տարածքներ կան։

«Ընդհանրապես, 60-րդ հոդվածի կարգերն էլ պետք է դիտենք, որովհետև ժամանակին այդ կարգավիճակը տվել են, բայց այսօր որ նայում ենք, այս շուկայական հարաբերություններում, պայմանագրային մասում մարդիկ կարողանան կառուցել, և շինությունը այլ կարգավիճակ ունենա»,- նշեց նա։

Պատգամավորը նաև շեշտեց, որ դիմում են կամ մի նամակ են ուղարկում, 7 հոգով կարդում են, չեն հասկանում։

«Երբ ենք մենք զոնինգ ունենալու, որ անձից կախված չլինի, դուք շղթայի մի մասն ենք»,- նշեց Սուքիասյանը։

Նա նշեց, որ այս ամենի պատճառով մարդիկ խնդիրների մեջ են ընկնում, և այս խնդիրը պետք է շատ արագ լուծել։