Չինաստան–Հայաստան ապրանքաշրջանառությունն աճել է

Մեկ տարվա ընթացքում Չինաստանի և Հայաստանի միջև փոխադարձ ապրանքաշրջանառությունն աճել է 22,5 տոկոսով, ինչը լավ ցուցանիշ է։ Այս մասին լրագրողների հետ զրույցում հայտարարել է Հայաստանում Չինաստանի արտակարգ և լիազոր դեսպան Լի Սինվեյը։

Դիվանագետը նշել է, որ 2025 թվականը շատ խորհրդանշական տարի է իր համար, քանի որ հենց այդ տարում է նա նշանակվել Հայաստանում դեսպան։ Նրա խոսքով՝ մեծ պատիվ է մասնակցել Չինաստանի և Հայաստանի հարաբերությունները նոր մակարդակի բարձրացնելու գործընթացին՝ նկատի ունենալով ռազմավարական գործընկերության հաստատման վերաբերյալ փաստաթղթի ստորագրումը։

Լի Սինվեյը կարևոր իրադարձություն է համարել նաև Հայաստանի միանալը Ասիական ենթակառուցվածքային ներդրումների բանկին (AIIB)։ Դեսպանը վստահեցրել է, որ Չինաստանը պատրաստ է աջակցություն ցուցաբերել Հայաստանին այս գործընթացի շրջանակներում՝ ընդգծելով, որ դա լրացուցիչ հիմք է երկկողմ համագործակցության խորացման համար։

Դիվանագիտական առաքելության ղեկավարը նշել է, որ Չինաստանն ու Հայաստանը հնագույն քաղաքակրթություններ են՝ հազարամյակների հարուստ պատմությամբ։ Նրա խոսքով՝ փոփոխվող աշխարհում երկու երկրներն էլ ձգտում են զարգացման, և երկկողմ համագործակցության արդյունքները տեսանելի և շոշափելի կլինեն երկու ժողովուրդների համար։