Թուրքիան կարող է հրաժարվել ռուսական S-400 համակարգերից

Bloomberg-ը, հղում անելով աղբյուրներին, հաղորդում է, որ Անկարան ձգտում է վերադարձնել Ռուսաստանից ձեռք բերված S-400 զենիթահրթիռային համակարգերը: Գործակալության տվյալներով՝ նախագահ Ռեջեփ Թայիփ Էրդողանը այս հարցը բարձրացրել է Վլադիմիր Պուտինի հետ անցյալ շաբաթ Թուրքմենստանում կայացած հանդիպման ժամանակ:

Կրեմլն արդեն հերքել է նման խնդրանք ուղղակիորեն ներկայացնելու լուրը, սակայն Bloomberg-ը հաղորդում է, որ երկու երկրների պաշտոնյաների միջև նմանատիպ քննարկումներ տեղի են ունեցել նախկինում:

Անկարան, ըստ աղբյուրների, հույս ունի բարելավել հարաբերությունները Միացյալ Նահանգների հետ. S-400-ներից հրաժարվելը կարող է քայլ լինել դեպի թուրքական պաշտպանական արդյունաբերության նկատմամբ պատժամիջոցների վերացումը և Թուրքիայի վերադարձը F-35 կործանիչների ծրագրին: Թուրք դիվանագետներից մեկը ենթադրել է, որ պատժամիջոցները կարող են վերացվել արդեն հաջորդ տարի:

Հիշեցնենք, որ Թուրքիան Ռուսաստանից S-400-ը գնել է 2017 թվականին, ինչը սուր հակամարտություն է առաջացրել ԱՄՆ-ի հետ և հանգեցրել երկրի բացառմանը F-35 ծրագրից։