Կրեմլը չի մեկնաբանի ԱՄՆ-ի հետ բանակցությունների արդյունքները

ՌԴ նախագահի մամուլի քարտուղար Դմիտրի Պեսկովը բրիֆինգի ընթացքում հայտնել է, որ Կրեմլը մտադիր չէ մեկնաբանել ԱՄՆ-ի հետ Մայամիում անցկացված բանակցությունների արդյունքները։

Լրագրողի հարցին՝ արդյոք խաղաղ կարգավորման առաջարկների ցանկում այլևս չկա Ուկրաինայի ՆԱՏՕ-ին անդամակցության մասին կետ, Պեսկովը չի պատասխանել։

Նրա խոսքով՝ բանակցություններին մասնակցած ՌԴ ներկայացուցիչը «ունեցել է հնարավորություն նախագահին զեկուցել իր ուղևորության արդյունքների մասին՝ բոլոր մանրամասներով»։

Ավելի վաղ ԱՄՆ նախագահ Դոնալդ Թրամփը Ֆլորիդա նահանգում գտնվող իր առանձնատանը ունեցած ելույթի ընթացքում կարծիք է հայտնել, որ Ռուսաստանի և Ուկրաինայի մասնակցությամբ բանակցությունները ընթանում են բնականոն կերպով։ Ամերիկյան նախագահը ընդգծել է, որ բոլորը հոգնել են հակամարտությունից, և այն պետք է ավարտվի։