Ճապոնիան կդառնա աշխարհի երրորդ ամենամեծ ռազմական բյուջե ունեցող երկիրը

Ճապոնիայի կառավարությունը հաստատել է երկրի պատմության մեջ ռեկորդային՝ ավելի քան 9 տրիլիոն իեն (շուրջ 58 միլիարդ դոլար) կազմող պաշտպանական բյուջեն։ 2026 ֆինանսական տարվա համար նախատեսված այս ծրագիրը նախորդ տարվա համեմատ աճել է գրեթե 10%-ով՝ նպատակ ունենալով արդիականացնել երկրի զինված ուժերը և դիմակայել տարածաշրջանային մարտահրավերներին։

Բյուջեի զգալի մասը՝ մոտ 6,2 միլիարդ դոլար, կուղղվի հրթիռային ներուժի հզորացմանը, այդ թվում՝ 1000 կիլոմետր հեռահարություն ունեցող հայրենական արտադրության հրթիռների ձեռքբերմանը։

Պաշտպանական ծախսերի կտրուկ ավելացումը տեղի է ունենում Չինաստանի հետ աճող լարվածության ֆոնին, հատկապես՝ Թայվանի հարցում Ճապոնիայի հնարավոր ներգրավվածության մասին հայտարարություններից հետո։

Հինգամյա այս վերազինման ծրագրի արդյունքում Ճապոնիան կդառնա աշխարհի երրորդ ամենամեծ ռազմական բյուջե ունեցող երկիրը՝ ԱՄՆ-ից և Չինաստանից հետո։

Ռազմական ծախսերի աճող բեռը հոգալու համար երկրի իշխանությունները նախատեսում են բարձրացնել մի շարք հարկատեսակներ, այդ թվում՝ կորպորատիվ շահութահարկը և եկամտահարկը։