Վարչապետ Նիկոլ Փաշինյանը կառավարության նիստում անդրադարձել է հանրային ծառայության վարձատրության մեխանիզմներն օրենքով կարգավորելու առաջարկին։
Նա նշել է, որ այս թեմայի շուրջ ծանր քննադատություններ են հնչել. «Ինչքան էլ ծանր քննադատությունների ենք արժանանում, բայց այս մեխանիզմով մեր պետության հետագա զարգացման ճանապարհին կարևոր քայլ ենք անում», — ասել է նա։
Ըստ վարչապետի՝ այս համակարգն արդյունքներ է բերում առաջին հերթին ՀՀ քաղաքացիներին ու մեր պետական ռեսուրսների առավել արդյունավետ կառավարմանը. «Այս համակարգը կարևոր եմ համարում հակակոռուպցիոն քաղաքականության տեսակետից»։
Ըստ նրա՝ 2018 թ. հեղափոխությունից հետո կոռուպցիայի ընկալման համաթվերում մեծ աճ ենք արձանագրել, սակայն հիմա որոշակի լճացում կա. «Մենք պետք է մեր երկրում հակակոռուպցիոն ստանդարտներն ավելի խստացնենք, ավելի բարձր ստանդարտներ սահմանենք, և այս որոշումը տեղավորվում է այդ տրամաբանության մեջ»։
Նա կարևորել է նաև կրթության դերը. «Սա շատ կարևոր ներդրում է՝ մեր կրթական համակարգի զարգացմանը»։
