ՀՀ վարչապետ Նիկոլ Փաշինյանը, ԱԱԾ սահմանապահ զորքերի օրվա առթիվ ելույթ ունենալով, ասել է, որ սահմանապահ ծառայությունը խաղաղության կարևորագույն խորհրդանիշն է։
«Այնտեղ, որտեղ սահմանապահն է կանգնած, անվտանգության նկատմամբ վստահության ավելի մեծ մակարդակ կա։ Այս վստահության բերումով է, որ պետությունը որոշում է կայացնում սահմանի այս կամ այն հատվածը հանձնել սահմանապահ զորքերի ծառայությանը»,- ասել է վարչապետը։
Նա հավելել է, որ կառավարության նպատակն է, որ Հայաստանի բոլոր սահմանները լինեն սահմանապահ զորքերի պատասխանատվության ներքո. «Մենք գնում ենք այդ ճանապարհով։ Առաջիկայում կշարունակենք և ավարտին կհասցնենք Հայաստանի և Ադրբեջանի միջև սահմանազատումը»,- նշել է վարչապետը։ Նրա խոսքով՝ օրակարգում է նաև Վրաստանի հետ սահմանազատման գործընթացի ամփոփումը։
«Սրանով, ըստ էության, ՀՀ սահմանազատումն ու սահմանագծումը կամփոփվեն, և մեր պետությունը՝ միջազգայնորեն ճանաչված տարածքում, ավելի վստահորեն զարգացման օրակարգի վրա կենտրոնանալու հնարավորություն կունենա»,- ասել է Նիկոլ Փաշինյանը։
