Սահմանին իրավիճակի սրման պայմաններում իրավիճակը սրվում է նաև տեղեկատվական հարթակում: Նման դեպքում հատկապես խոցելի են դառնում հայկական լրատվական կայքերը և ֆեյսբուքյան օգտատերերը:
Նախորդ 2-3 օրվա ընթացքում ադրբեջանցիները կոտրել են լրատվական մի քանի կայքեր. զերծ չէ մնացել նաև մեր խմբագրության կայքը: Դրանից բացի, հակառակորդը թիրախավորում է ֆեյսբուքյան օգտատերերի էջերը: Տեղեկատվական անվտանգության փորձագետ Սամվել Մարտիրոսյանը նշում է, որ ֆեյսբուքյան պրոֆիլի ապահովության համար անհրաժեշտ է միացնել կրկնակի ստուգման հնարավորությունը: Այս դեպքում ամեն անգամ Ձեր ֆեյսբուքյան էջ մուտք գործելիս Ձեր էլեկտրոնային հասցեին գաղտնաբառ կգա: Փորձագետի խոսքով՝ նման դեպքում հաքերները ոչ մի կերպ չեն կարողանա կոտրել Ձեր կայքը:
Դրանից բացի, տեղեկատվական անվտագության փորձագետները նշում են, որ կարևոր է, թե ինչ էլեկտրոնային հասցեով է բացվել Ձեր ֆեյսբուքյան էջը: Ադրբեջանական հաքերների կողմից կոտրված հայերի էջերը սովորոաբար բացված են լինում mail.ru սերվերով, մինչդեռ gmail-ը, որը պատկանում է «Գուգլ» ընկերությանը, առավել պաշտպանված է: Անկախ սահմանային սրվածությունից՝ տեղեկատվական պատերազմի մեջ մենք գտնվում ենք մշտապես, ուստի, հետևելով այս տարրական կանոններին, կարելի է խուսափել Ձեր էջի կոտրվելուց: Մասնագետները խորհուրդ են տալիս նաև հաճախակի փոխել գաղտնաբառը՝ դրա մեջ օգտագործելով հնարավորինս շատ և տարբեր սիմվոլներ, տառեր, թվեր:
Հակառակորդը գրոհ է սկսել նաև օգտատերերի մեկնաբանություններում տեղեկատվություններ գրելով: Հարկավոր է արձագանքել և հեռացնել նման մեկնաբանությունները: Հաքերային հարձակումների այս տհաճ շրջանում, կարելի է ասել միայն այն, որ հայկական կողմը ջախջախիչ պատասխան է տալիս հակառակորդին նաև այս դաշտում՝ կոտրելով բազմաթիվ կայքեր և էջեր:
Նելլի Խաչատրյան