Ինչո՞ւ Մամեդյարովի գլխին սև ամպեր կուտակվեցին

Հայ-ադրբեջանական հակամարտ զորքերի շփման գծում մի  քանի ժամ տևած անդորրից հետո հակառակորդը վերսկսել է կրակ բացել հայկական գյուղերի ուղղությամբ: Հնարավոր է այս ամենը կապ ունենա երեկ տեղի ունեցած աննախադեպ իրադարձության հետ: Ադրբեջանի նախագահը մեղադրեց արտաքին գործերի նախարար Էլմար Մամեդյարովին անգործության մեջ, դրանից հետո ըստ տեղեկությունների Մամեդյարովը պատրաստվում է հրաժարականի դիմում ներկայացնել: Այս պահին Մամեդյարովի հրաժարականի պաշտոնական դիմում դեռ չկա:

Իհարկե, հրաժարականի մտադրության պաշտոնական պատճառը համարվում է Մամեդյարովի՝ հայերի հետ կորոնավիրուսին առնչվող հարցերի մասին քննարկում ծավալելու պատրաստակամությունը, սակայն բոլորին հասկանալի է, որ Մամեդյարովը հրաժարական տալու դեպքում դա կանի  Արցախի հարցում տապալված արտաքին քաղաքականության և բանակցային գործընթացի լիարժեք տապալման պատճառով: Նման մակարդակի պաշտոնյային հանդիմանելուց հետո դժվար կլիներ հավատալ, որ Ադրբեջանը չի փորձի կրկին սրել իրավիճակը:

Ադրբեջանի վարչապետ Ալի Ասադովի խոսքով` Մամեդյարովը աշխատել է տնից, սակայն նրան չեն կարողացել գտնել, վերջինս հայ-ադրբեջանական սահմանին տիրող իրավիճակի մասին որևէ պաշտոնական հայտարարություն չի արել: Կարծում ենք՝ պարզ է,  որ իրականում Մամեդյարովի՝ հայտարարություն անել կամ չանելը կախված է եղել Իլհամ Ալիևի ցանկությունից, պարզապես Ադրբեջանի տարածքային, տեխնիկայի և մարդկային կորուստներից հետո հարկավոր էր «զոհաբերել» կարևոր պաշտոնյայի, որպեսզի քաղաքացիները տեսնեն, որ իրենց կառավարությունն աշխատում է: Որոշ պաշտոնյաներ կանխատեսում են որ պաշտպանության նախարարը ևս կարող է հրաժարականի դիմում ներկայացնել:

Կփոխվի՞ Արցախի հարցում Ադրբեջանի արտաքին քաղաքականության վեկտորը Մամեդյարովի հրաժարականի դեպքում, այս պահին դժվար է կանխատեսել, սակայն մի բան հստակ է, որ  նոր նախարարի նշանակումից հետո վերջինս պետք է ծանոթանա բանակցային ողջ գործընթացին, ուստի բանակցային գործընթացում կարող ենք ունենալ ձգձգվածություն:

Նելլի Խաչատրյան