Բիզնեսը սկսել է կարոտել «կաշառք արագության դիմաց» մոդելին

Հեղափոխությունից հետո բիզնեսմիջավայրի մթնոլորտի փոփոխության ակնկալիքով և կառավարության հորդորները լսելով բազմաթիվ բիզնեսմեններ շտապեցին ներդրումներ կատարել Հայաստանում։ Նախկին բյուրոկրատական քաշքշուկների, փող վերցնելու և ցանկացած հարց փողով լուծելու արատավոր պրակտիկային պետք է փոխարինելու գար որակական այլ իրավիճակ։ Երևանի կենտրոնը ամենածանրաբեռնվածն է հյուրանոցներով, ռեստորաններով և սրճարաններով։ Այս ոլորտը ամենաշատն է ենթարկվում տարատեսակ ռեֆորմների, որոնցից ոչ մեկը ուղղված չէ կուտակված խնդիրներին համակարգային լուծում տալուն։ Երևանի քաղաքապետարանը և կենտրոնի թաղապետարանը մասնավորապես քաղաքացիների և բիզնեսի սպասարկման որակական այլ լուծում այդպես էլ չկարողացան առաջարկել։ Առերևույթ վերացավ նախկին՝ փողով հարց լուծելու պրակտիկան, որին չհաջորդեց խնդիրները և փաստաթղթային շրջանառությունը մաքսիմալ կարճ ժամկետներում կազմակերպելու և սպասարկելու նորամուծությունը։ Բիզնեսը սկսեց կարոտել «կաշառք արագության դիմաց» մոդելին։ Քաղաքապետարանը տարրական և ոչ մի հավելյալ ուսումնասիրություն չպահանջող թույլատվություններն ու փաստաթղթերը տրամադրում է տասերկուօրյա ժամկետում, ստուգայցերն անցկացնում զրկելու, քանդելու, պատժելու տրամաբանությամբ, քաղաքացիների սպասարկումը կազմակերպում անմարդկային պայմաններում, իրական խնդիրների լուծման անկարողությունը կապում նախկինների սխալների հետ։ Գերատեսչությունների մեջ քաղաքացուն «տշելու» սովորությունից չհրաժարվելը վաղը հստակ և ընդգծված գնահատական է ստանալու։ Ոչ մի օղակում այդքան շուտ չի ծնվում դժգոհության ալիքը որքան քաղաքացիների և բիզնեսի սպասարկման այդ օղակներում։ Կենտրոնի նոր թաղապետի նշանակումը մեծ հույս ներշնչեց սպասարկման ժամանակակից մշակույթի ձևավորման տեսանկյունից։ Բայց պարոն մնացականյանի թիմը կարծես թե շարժվում է այլ ուղղությամբ։ Կենտրոնի գովազդային վահանակների պոռնոգրաֆիկ տեսքի վրա ազդելու անկարողությունը, կցակառույցներից ոչ մի կերպ ազատվել չկարողանալու բարդույթը տեղական իշխանիկները փորձում են կոմպենսացնել նորերին մաքսիմալ «փակելով»։ Քաղաքացիների անանուն բողոքները հալած յուղի տեղ ընդունող քաղաքային իշխանությունները պետք է հստակ գիտակցեն, որ տնտեսվարող սուբյեկտը նաև հարկատու է, աշխատատեղ ստեղծող, և օրենքի բացերի հետևում թաքնվելու փոխարեն մտածեն և գտնեն մեխանիզմներ, անհիմն կամակորությունը խնդրից տարբերելու մոդելներ։ Հայաստանի Ռեստորատորների և Հոթելիերների Ասոցիացիա ՀԿ-ն այս ընթացքում ստացել է բազմաթիվ բողոքներ և շուտով հանդես կգա ոոլորտի խնդիրներին վերաբերող մասնագիտական վերլուծությամբ։
Հայաստանի Ռեստորատորների և Հոթելիերների Ասոցիացիա ՀԿ