Մենք անխորտակելի թև ու թիկունք ենք մեր ժողովրդին. Տաթևիկ Կարապետյան

Ռուսաստանաբնակ հայտնի գործարար, բարերար «Տաշիր Գրուպ»-ի սեփականատեր Սամվել Կարապետյանի դուստրը` Տաթևիկ Կարապետյանը, ում ֆրանսիական  Institut Choiseul (Ինստիտուտ Շուազել) վերլուծական կենտրոնը ներառել է Ռուսաստանի 100 երիտասարդ առաջնորդների ցուցակում, ինստագրամյան իր էջում անդրադարձել է Ադրբեջանի՝ Հայաստանի հանդեպ ագրեսիային և սահմանային իրադարձություններին: Նա մասնավորապես գրել է.

-Ի՞նչ է իրական հայրենասիրությունը: Սերը այն երկրի հանդեպ, որտեղ ծնվե՞լ ես, այն վայրի հանդեպ, որտեղ ապրում են քո հարազատներն ու մտերիմնե՞րը, այն հողի հանդեպ, որտեղ ապրել են նախնինե՞րդ: Յուրաքանչյուրն այս հարցի իր պատասխանն ունի, բայց մի բան միանծանակ է. Այդ զգացմունքը յուրահատուկ տեղ է զբաղեցնում մարդու սրտում:

Իսկ սիրտն սկսում է ցավել հայրենիքին սպառնացող անգամ ամենափոքր վտանգի դեպքում: Այս օրերին իմ սիրտը տագնապած է այն ամենի պատճառով, ինչ կատարվում է հայրենիքիս՝ իմ Հայաստանի սահմանին:

Ստեղծվել է մի իրավիճակ, որը միջազգային հանրության ուշադրությունն է պահանջում, և ես հուսով եմ, որ համապատասխան արձագանքը շատ չի ուշանա: Պետք է կանխել հակամարտության հետագա սրացման հնարավորությունը պատրեազմից խուսափելու համար:

Ցանկացած սպառնալիք, որը ծագում է մեր երկրի, մեր ժողովրդի և նրա խաղաղ կյանքի համար, անընդունելի է: Իմ հզոր ժողովուրդը, որն իր պատմության ընթացքում բազմաթիվ ողբերգություններ է ապրել, ոչնչացման եզրին հաըտնվել, գոյատևել է. Ապրել արժանապատվորեն՝ պահպանելով իր լեզուն, մշակույթը, կրոնը, պետկանությունը՝ մեծ սեր տածելով հայրենիքի և նրա հարուստ ժառանգության նկատմամբ: Այդ իսկ պատճառով մենք լավ գիտենք ազատության ու կյանքի գինը: Եվ, իհարկե,  մենք այլևս թույլ չենք տա բռնության ու ագրեսիայի կրկնություն ու կպաշտպանենք մեր հայրենիքը բոլոր միջոցներով:

Վերջին օրերի իրադարձությունները աշխարհասփյուռ հայությանը համախմբել են Հայաստանի շուրջ: Մենք անխորտակելի թև ու թիկունք ենք մեր ժողովրդին և անելու ենք հնարավորը հայրենի երկրում ապրող խաղաղ մարդկանց խաղաղ երկնքի ապահովման համար: