Ըստ կոնգրեսական Փալոնի գրասենյակի տարածած մամլո հաղորդագրության՝ Ամերիկան պետք է վստահ լինի, որ ամերիկյան արտաքին օգնությունը չի հակասում իրենց արժեքներին ինչպես տանը, այնպես էլ դրսում։
«Ամերիկայի ձայն». ԱՄՆ ներկայացուցիչների պալատը ընդունեց 2021 թվականի Ազգային պաշտպանության հատկացումների մասին օրինագծում օրենսդրական մի շարք փոփոխությունների փաթեթը, որոնց թվում նաև Կոնգրեսի Հայկական հանձնախմբի համանախագահ Ֆրենկ Փալոնի հեղինակած փոփոխության օրինագիծը՝ Ադրբեջանին հատկացվելիք ամերիկյան ռազմական օգնության հետ կապված։
Նշվում է, որ Փալոնի առաջ քաշած փոփոխությունը նախատեսում է, որ ԱՄՆ պաշտպանության նախարարությունը, համագործակցելով պետքարտուղարության հետ, պետք է զեկույց ներկայացնի Կոնգրեսին՝ «Գործընկերների կարողությունների ամրապնդում» պաշտպանության նախարարության ծրագրի 333-րդ կետով ամերիկյան ռազմական օգնություն ստացած օտարերկրյա պետությունների ռազմական զորամիավորումների մասին, որոնց նկատմամբ առկա է կասկած, որ դրանք խախտում են միջազգային իրավունքը կամ մարդու իրավունքների դրույթները ռազմական օգնություն ստանալուց առաջ կամ ընթացքում։ Զեկույցը կներառի նաև մարդու իրավունքների բարելավման ուղղված առաջարկություններ, որոնք կնպաստեն այս տեսակի խախտումների կանխմնանը։
Ֆրենկ Փալոնը ընդգծում է օրենսդրական փոփոխության կարևորությունը, հատկապես երբ, Ադրբեջանը սպառնում է Հայաստանին։ Ըստ կոնգրեսականի՝ այս փոփոխությունը հիմք է հանդիսանում Ադրբեջանին ռազմական օգնությունից զրկելու համար, քանի որ Բաքուն մարդու իրավունքների հետ կապված ունի լուրջ խնդիրներ և վարում է ռազմատենչ քաղաքականություն։
