Ճնշում գործադրել Թուրքիայի վրա «Հայկական հարց»-ի վերաբերյալ․ ԱՄՆ-ն կրոնական զեկույց է հրապարակել

ԱՄՆ-ի միջազգային կրոնական հարցերով հանձնաժողովը հրապարակել է ամենամյա զեկույց, որտեղ անհանգստություն առաջացնող երկրների շարքում անդրադարձել է նաև Թուրքիային։ Զեկույցում մասնավորապես ասվում է, որ Թուրքիայում կրոնական պատկանելիության սահմանափակումը վտանգ է հանդիսանում երկրի ազգային փոքրամասնությունների համար։ Զեկույցի հեղինակները առաջարկներ են ներկայացրել Հայկական Առաքլական եկեղեցու Կոնստանտինոպոլսյան պատրիարքի ընտրության գործընթացի վերաբերյալ։
Հեղինակները կոչ են արել ԱՄՆ-ին ճնշում գործադրել Թուրքիայի վրա, որպեսզի հայ պատրիարքի ընտրություններն անցնեն առանց պետության միջամտության, ինչպես նաև դատապարտել քաղաքական այն գործիչների վարքը, որոնք իրենց ելույթներում ստորացուցիչ արտահայտություններ են օգտագործում ազգային փոքրամասնությունների մասին։
Նոր պատրիարքի ընտրությունների գործընթացը սկսվեց Ստամբուլի Հայ Առաքելական եկեղեցու պատրիարքի մահից հետո։ Թուրքիայի Սահմանադրական դատարանը կրոնական ազատության հանդեպ ոտնձգություն է համարել Թուրքիայի կառավարության՝ այդ հարցին միջամտելը։