Ասել, որ մենք հուշագիր ենք ունեցել ԲՀԿ-հետ, առնվազն քաղաքագիտական սխալ է․ Ալեն Սիմոնյան

Ինչպես արդեն տեղեկացրել էինք, «Քաղաքացիական պայմանագիր» կուսակցության գրասենյակում այսօր ընթանում էր հանդիպում վարչապետ Նիկոլ Փաշինյանի, մարզպետների, նախարարների և «Իմ քայլը» խմբակցության պատգամավորների մասնակցությամբ։ Ինչպես լրագրողների հետ զրույցում հայտնեց ԱԺ փոխխոսնակ Ալեն Սիմոնյանը, քննարկման թեման է եղել տնտեսության վիճակը՝ կորոնավիրուսի համավարակի պայմաններում:

Սիմոնյանի խոսքով՝ սա նոր ֆորմատ է, երբ գործադիրն ու օրենսդիրը միասին քննարկում են օրվա օրակարգային հարցերը, և այն կրելու է շարունակակական բնույթ։

«Այսօրվա օրակարգային հարցը վերաբերում էր տնտեսությանը, Covid-19-ին, տարբեր արձանագրումներ տեղի ունեցան, հարցեր, պատասխաններ հնչեցին: Այս տրամաբանության մեջ է եղել քննարկումը»,-ասաց Սիմոնյանը:

Անդրադառնալով «Իմ քայլի» և «ԲՀԿ»-ի միջև ստորագրված հուշագրին, Սիմոնյանը շեշտում է, որ դա հուշագիր էր զուտ նոր ընտրությունների անցկացման վերաբերյալ, որը տարբերվում է օրինակ Սերժ Սարգսյանի և ԲՀԿ-ի միջև ստորագրված հուշագրից։

Արտյոմ Քոսակյան