Այս պահին արցախա-ադրբեջանական սահմանի ողջ երկայնքով, ըստ էության, շարունակվում են մարտական գործողությունները տարբեր ինտենսիվությամբ, նորից կիզակետում շարունակում են մնալ հյուսիսային և հարավային ուղղությունները: Այս մասին քիչ առաջ բրիֆինգի ժամանակ տեղեկացրեց ՊՆ ներկայացուցիչ Արծրուն Հովհաննիսյանը:
Նրա խոսքով՝ Արցախի ՊՆ-ն րոպեներ առաջ հրապարակել է տեսանյութերով հիմնավորված տեղեկություն, որ հարավային ուղղությամբ ադրբեջանական զինված ուժերի բավականին լայնածավալ հարձակողական գործողությունները հետ են մղվել տանկային ստորաբաժանումներով, և այդ ընթացքում ադրբեջանական զինված ուժերը կորցրել են մոտավորապես 10-11 միավոր զրահատեխնիկա, հիմնականում՝ տանկեր:
«Թշնամին հետ է շպրտվել ելման դիրքեր, և այդ ուղղությամբ այս պահին համեմատաբար հանգիստ է, ընթանում են թեթև մարտեր, այլ ուղղություններով մարտերը շարունակվում են: Հրետանու կիրառությունը բավականին մեծ էր: Օրվա ընթացքում հրետակոծվել են նաև հյուսիսային հատվածի հայկական բնակավայրերը, մասնավորապես՝ Մարտակերտը և Մարտակերտի հարակից բնակավայրերում կրակի տակ են ընկել լրատվամիջոցների ներկայացուցիչները»:
